So weer dat Wedder in Dezembermoond

Dat Wedderdaagbook vun Uwe Mohr


Hüüt, an Eersten, hebbt wi nu meteorologischen Winteranfang. Mit Regenschuern, vele Wolken an Heven, düster un ungemütlich, over 9°C fangt de letzte Moond in't Johr an. Nich so passend för'n eersten Advent. Luert man af, dat ward seker noch anners un Regen löppt weg, Snee mööt wi schuven!


Stormböen schüddelt de Bööm. Foto ML

Hoch Ulrike bestimmt to Tied mit Nevel un ruhiges Wedder Dag un Nacht. De Meteorologen snackt over al wedder von Orkandeep un kohle Luft.

Ohle Nomen för Dezember weeren fröher: Christ-, Jul- odder Heilmoond. Wiel ik eben Noomen bi'n Wickel heff, dat niege Deep schall Xaver heten. Bi dat Wedder hüüt bruken wi uns ok över de Buernspruch: "Fallt to Eligius en kohle Winterdag, de Küll wohl veer Moonde duern mag", keene Gedanken moken. Dat mööt wi over över Xaver, denn över de Nordsee ruuscht he mit swore Orkanböen op uns to. An Barbaradag lött sik noch von "Ruhe för'n Storm" snacken, un Xaver hett noch Tied, düchtig Luft to holen, dormit he richtig dull pusten kann.

Tja, nu is de Klock een, alle snackt von Xaver un töövt op em. Over denn, to'n Nomeddag, hett he sien stöörmischen Böen ut sien Sack loten, un Regentrude gütt düchtig Regen dorto. To Nikolausdag schient dat so, as wenn Xaver sik över Nacht utjachtert hett un nu op Tour no'n Oosten is.


Hört wie de Kranz to'n Advent, wie de Dannenboom to Wiehnachten: de Christsteern... un Snee.
Foto Uwe Mohr

De eerste Snee düssen Winter is fullen. Allens is schön witt, dormit Nikolaus mit sien Gespann goot föhren kann. De Kinner hebbt Schoolfrie un freut sik, dat se mit'n Slern fohren könnt. Dat Schöne, noch blifft he liggen, un Fru Holle schüddelt noch wat to.

Ne doch ok, schon vörbi mit witt, Deep Yoda is ünnerwegs. Hett Novembertemperaturen, Nevel un Schietwedder mitbröcht. Winterwedder is vörbi un ok erstmol nich in Sicht. "Wintert dat vör Wiehnachten nich, denn wintert dat eben dorno." Jo, un mit de Sicht is dat ok nich wiet her. De ganze Dag Nevel, nich kohlt, — norddütsches Kuschelwedder.


De Tied blifft geheimnisvull... Foto ML

An 14. harrn wi de fröheste Sünnenünnergang. Dree Minuten vör veer is se in ehr Wolkenbett krabbelt! Mit Fröhjohrswedder in Winter geiht dat grau in grau op Wiehnachten to. Hüüt, an 21., is Thomasdag, de Wintersünnenwend. Dat is de körteste Dag un de längste Nacht in't Johr. Na'n Thomasdag ward de Doog ganz langsom wedder länger; se wassen üm een Hohnenschritt! Sieht Winteranfang al söss Minuten.

Nu, in de Tied von 25.12. bet 6.1., hebbt wi de Ruchnächte. Overgloven un urolen Bruuk ranken sik üm düsse twölf Nächte. Petrus meent dat to'n Enn von't Johr ok noch goot mit uns. An Oldjohrsovend fründliches Wedder mit düchtig Sünnenschien. Mit Elli Michler wünsch ik ju nu: "En goodes Fest in heimische Gemüür, ok dröges Holt to'n Füern, för een kommodig warmes Nest."

Wedderdoten letzte Moond:

  • De Dörchsnittstemperatur harr in 2 m Höchte 4,5°C , dat sünd 2,09°C övert Middel.
  • De Höchsttemperatur mit 12,8°C harrn wi Wiehnachtenovend un de deepste an tweeten mit -3,2°C.
  • 20 cm in de Eer harrn wi in Dörchsnitt 5,25°C un 5 cm över de Eer de deepste mit -3,9°C an tweeten.
  • Sünnschien weer nix Dulles. Bloots 14,5 Stünn, dat sünd man knapp 40% von't Soll.
  • Solorstrohlung ok dorher recht mau, bloots 42 W/m². Hoch weern an sössten 248 W/m².
  • Regen an 25 Doog hett 75 l/m², sünd 93% von't Soll. Aftrocken sünd dörch Evapotranspiration 6,4 l/m².
  • De Pusterich hett an meisten mit 29% ut W-SW weiht un an düllsten mit 87,6 km/h (9 Beaufort) an'n Nikolausdag ut W-NW.
  • De Moond harr söven Frostdoog (Tmin < 0°C) un achtuntwintig kohle Doog (Tmax < 10°C).

Mehr Wedder gifft dat hier: hartenholmer-wetter.de.


3.1.2014


na baven