So weer dat Wedder in Novembermoond

Dat Wedderdaagbook vun Uwe Mohr


Nu is he dor, de letzte Harvstmoond. Mit Smuddelwedder, over ok mit afwesselnd Sünn un Wolken, kohlen Wind un siede Temperaturen markt wi, dat he de Övergang to'n Winter is.


November, trist un schöön. Foto ML

Wat kümmt dorbi rut? Een Deep jogt dat nächste! No Crischan stellt sik nu Stormdeep Friedrich in. Wedder ümweihte Bööm, kaputte Däcker un veel Arbeit för de Füerwehrlüüd. Uns Oldvorderen hebbt sik schon wat dorbi dacht, as se em de Nomen "Wind-, Winter- un Nevelmoond" geven hebbt.

An 4. keem de olle Regentrude wedder vull in Akschoon. Dat pladder de ganze Dag. Is over noch nich allens. Deep Godehard will uns nu dat Wedder moken. Dat heet also: Veel grau in grau un bloots wenig blau! Huch, wat is dat? Bloots 2,6°C an Morgen un düchtig Nevel. Bit nu, Anfang de 2. Dekade, weer de Novembermoond mit sien Temperaturen egentlich doch recht kommodig. De Wedderlüüd seggt over, nu is vörbi mit över 10°C. Wat passert? Hüüt, vunmorgen, bloots 1,1°C an de Eer! Al Sommer- gegen Winterreifen tuscht? Liekers, ok de Regenschirm is noch wichtig!


Frostblomen, Foto Uwe Mohr. Klick op to'n Vergröttern!

An Ovend lohnt sik ok mol to'n Heven to kieken. Kannst Sterne lüchten sehn, bedüüdt dat to düsse Johrestied meistens, dat ward frostig. "Novemberheven vull mit Stern, denn hest en warmen Oven gern." Kannst nu ok bruken. An Morgen -0,9°C , un an de Eer sogor nur -2,2°C. De eerste Frost düssen Harvst.

Hüüt is Martinsdag. Dor geiht dat wedder de Göös an de Feddern. Sankt Martin hett jo sien Mantel mit en Bettler deelt. Wi mokt dat anners. Wi delen uns hüüt Ovend een Goos mit söss Lüüd. Een so, de anner so.

In Rheinland ropen de Narren nu wedder "Helau un Alaaf" un in de Wedderköök swingt nu Deep Nikolaus de Koklöpel. He hett teemlich kohle Temperaturen in Pott. Mit Nevel, swatte Wolken, de ganze Dag Schummertied, so geiht dat wieder. Wedder, passend to de stille Wuch twischen Volkstruerdag, Buß- un Beetdag un Dodensünndag.


Iesblomen, Foto Uwe Mohr. Klick op to'n Vergröttern!

To Anfang von de drütte Dekade kannst luut seggen: Brrrrrr, nu hebbt wi Pullover- un Handschohwedder. Dampende Schosteens, Ruuchriep an Twiegen, Gras un Büscher. Dorto -5,6°C Luftfrost un -6,1°C an de Eer, dorut ward bi blauen Heven un Sünnenschien en schöne Winterdag.

Dat is over nu, an Enn von Moond, vörbi. Mit Novemberwedder, düster un natt, geiht dat nu in de eerste Winterwuch.

Wedderdoten letzte Moond:

  • De Dörchsnittstemperatur harr in 2 m Höchte 5,16°C , dat sünd 0,16°C övert Middel.
  • De Höchsttemperatur mit 11,2°C an 1. un de deepste an 21. mit -5,4°C.
  • 20 cm in de Eer harrn wi in Dörchsnitt 7,23°C un 5 cm över de Eer de deepste mit -6,1°C an 25.
  • Sünnschien weer recht knapp. Bloots 41 Stünn, dat sünd man 80% von't Soll.
  • Solorstrohlung in Dörchsnitt bloots 75 W/m². Hoch weern an 5. liekers noch 480 W/m².
  • Regen harrn wi an 22 Doog 65, 6 l/m², sünd 90% von't Soll. Aftrocken sünd dörch Evatranspiration 8,9 l/m².
  • De Pusterich hett an meisten mit 32% ut W-SW pustet un am stärksten mit 55 km/h (7 Beaufort) ut desölve Richtung.
  • De Moond harr 7 Frostdoog (Tmin < 0°C) un 25 kohle Doog (Tmax < 10°C).

Mehr Wedder gifft dat hier: hartenholmer-wetter.de.


1.12.2013


na baven