So weer dat Wedder in Oktobermoond

Dat Wedderdaagbook vun Uwe Mohr.
All Biller: Uwe Mohr


Nu hebbt wi doch wohrhaftig de tweete Harvstmoond bi'n Wickel.


Dat Kalf is al groot, aver de warme Melk bi Mama smeckt noch so good!

Lootsommerlich geiht he an Start, uns hoffentlich gollen Oktober. As fröhliche Wannersmann pinselt he Bööm, Strücker, Tuuns un Hecken bunt an. Ole Nomen för den Oktober sünd Gilbhart (dat Loof ward geel), Wien- un Oornmoond.


De Bläder staht al an'n Start, praat to'n Affalln

Noch nich ganz so oolt, over een ganz besünnenren Dag in Oktobermoond is de 24. Johrsdag von de Düütsche Eenheit. Dat Düütschland düssen Dag fiert, gefallt ok Deep Maria — noch över England — un Fründ Lutz över Oosteuropa. Beide regelt för düssen historischen Dag dat Wedder. Passlich mit blauen Heven, söven Stünn Sünnenschien, bit 21°C Warms un bloots sachten Wind ut SO, bringt se ehren Bidrag to'n Nationalfierdag.


Oorndank: Bunt smückte Altorruum mit Gaven vun Feld un Goorn

Bestes Spätsommerwedder ok an Oorndankfest. Hüüt, an söventen, is Petrus leider
infullen, dat wi al in Harvst sünd. Gau schickt he Stormdeep Katrin los. Över de Nordsee trudelt se bi uns in. Wat hett se in de Packeloosch? Wie kann't anners sien: Harvststorm, swatte Wolken un Regen. Schient, as wenn nu doch bald de Doog koomt, an de dat Hunnen un Katten regen ward. Afluern, noch küünt wi uns nich beklogen.

Swupps, de tweete Dekode is dor. In de Nacht von 11. op 12. Gewidder mit en düchtigen Regenschuer. "Oktobergewidder, de seggt beständig: de komende Winter ward wedderwendig."


Dat Drüsige Springkruut stammt ut Indien un hett dat geern natt an de Fööt

Vörbi mit 20°C. Natt, wesselhaft un mit Nevel geiht dat in de Mitt von Moond. Hörst ok keen Vogel mehr singen. "Mit Hedwig un Sankt Gall, vörbi mit Quinkeleren in de Vogelwelt." Liekers, de eersten twee Wuchen in Moond weern utsproken warm. Nu mokt sik over vele Wolken breet. Bi Regen, mit kräftigen Pusterich, mag de Sünn gor nich op de Eer kieken.


De Harvst treckt in't Land

Ik harr jo all schreven, is vörbi mit 20°C. Vonwegen, an negenteihnsten en stootschen Oktobersommerdag mit bit to 21°C! Dat weer over nomeddaags vörbi. No en düchtigen Schuer sünd wi bi 17°C landet. Wesselhaft, natt un köller, bloots 12°C, geiht dat in de Drütte Dekode.

Nu is he dor, de Harvst. För uns to'n Glück ohn' Deep Noa un Ex-Hurrikan Gonzalo, de uns de Meteorologen ok för't Binnenland opsnacken wulln. Na ja, leever mol mehr wohrschuun as to wenig. Över de Nordsee, an de Küst, in Süd- un Westdüütschland sünd se jo bannig to kehr gohn; för uns harrn se keen Pust mehr för dicke Backen.


Prachtvulle Mehlbeeren

Veel Nevel un Wolken farven de Heven von blau in grau. "Veel Nevel in Oktobermoond — in Winter vele Flocken fallt dool." An 30. morgens Klock acht: -0,2°C! De erste Luftfrost düssen Harvst.

Weer over nix von Duer. An Reformationsdag fründjert sik doch Deep Pia un Hoch Quinn an. De Romanze worr so hitt, dat de Oktober mit bit to 16°C Warms in November röver geiht.


De Sünn geiht to Bett

Wedderdoten letzte Moond (in Klammern de Doten vun'n Vörmoond):

  • De Dörchsnittstemperatur harr in 2 m Höchte 12,4°C (Vörmoond 15,5°), dat sünd 3,2°C övert Middel.
  • De höchste Temperatur mit 21°C (26°) weer an 19., de deepste mit -0,2°C (3,6°) an 30.
  • In'n Dörchsnitt harrn wi 20 cm in de Eer 13,4°C (16°) un 5 cm över de Eer de deepste Temperatur mit 0,0°C (2,8°).
  • De Sünn hett 106 Stünn (185) Stünn von Heven schient.
  • De Solorstrohlung keem op 151 W/m² (265). Se weer an hööchsten mit 754 W/m² (990) an twölften.
  • Regen hett an 19 Doog (18) 51 l/m² (35) fullen. Dat sünd bloots 73% von't Soll.
  • Dörch Evapotranspiration sünd wedder 24 l/m² (45) fleuten gohn.
  • De Wind hett mit 46 km/h (6 Bft) ut W-SW pustet un keem ok mit 36% ut W-SW.
  • Wi harrn in Oktober 1 Frostdag (Tmin < 0°C), 1 Kolen Dag (Tmax < 10°C) un 6 warme Doog (Tmax > 18°C).

Mehr Wedder? hartenholmer-wetter.de.


5.11.2014


na baven