So weer dat Wedder in Maimoond

Dat Wedderdaagbook vun Uwe Mohr.
All Biller: Uwe Mohr


"Wees mi grööt, du leeve Mai, mit Loof un Blöten allerlei..." (W.Busch, Platt U.Mohr)

De föffte Moond in't Johr kümmt, as de April aftrocken is. Dat eerste Wuchenend in Mai liggt achter uns mit kohlen Wind, wesselhaften Heven, Regen — over ok mit Sünn. Ole Nomen weeren fröher Wieschen-, Marien- un Blomenmoond.


Appelblöden: Ogensmoos in'n Mai — Gumensmoos in'n Harvst!

Eben heff ik de eerste Rookswolk sehn! Over: Een Swolk mookt noch keen Sommer! Ovends suust de Fleddermüüs dörch de Luft; se jogt Insekten. — En Teken, dat bold Warms kümmt? Mol sehen, wat de nie'e Wuch uns bringt!

Bedeckt, mit Wind ut SW, beten Sünn, so fangt de ni'e Wuch an. — Nich dat Wedder, de Natur hett sik bannig ännert. Gröne Koppeln lüchten geel, alles wasst un wiest sik zoort un bunt. Ut de Büscher hörst du dusend Töön, in't frische Gras kaut tofreden de Köh.

De sösste weer de Dag, an den de Regen keem. Vörmeddags meist sommerlich Wedder. De Warms kladder op 23,6°. Klock viddel no fief swatte Heven, mit düchtig Wind ut SW. — Deep "Zoran" , noch över England, mischt mit! O hauehaueha, Gerummel an Heven! Dat is Weddergott Thor. He jachtert mit sien Arbeitswogen, Regentrude in Slepp, de düchtig Woter ut ehren Rock fallen lött, över de Wulkenstroten. Dor smitt he sien Homer, dat de Blitze man bloots so von Heven zucken. No en Viddelstünn is he Richt Oosten wieder rummelt, ohn veel Schoden to moken. Beten loder is Regentrude denn ok afhaut, dor harr se 15 l/m² utgoten.


Hoppetutzen bi't Sünnenbaden

No wesselhafte Doog, mit nödigen Regen, geiht't in't Wuchenend. "Maimoond warm un dröög — allens Wassen is vergevene Möög." Deep "Andreas", noch över de Nordsee, will dat Wedder opmischen. Mit swatten Heven, düster Regenschuer, nich sünnerlich warm un Wind ut NO meent he, dat kunn passend sien. "Mai kohlt und natt bringt de Buern watt in't Fatt."

För de nie'e Wuch hebbt sik de Ieshilligen meldet. Von 11. bit 13. sünd de "gestrengen Herrn" ünnerwegens (een dorvun, Sophia, is ja sogor en Daam). Oppassen, se hebbt wat gegen junge Planten! Mit Frost verdarvt se dat Wassen. Goethe meent dorto: "De eerste Leev un de Mai goht selten ohne Frost vörbi."

De Gröönlandtempratuur warrt so berekent: Vun Johrsbeginn an warrt all positive mittlere Daags-Middeltemperaturen tohooptellt. Dorbi warrt Tempraturen ut'n Januar mal 0,5 nahmen, Tempraturen ut'n Februar mal 0,75 un vun Märzmoond af an mal 1. Wenn de Summe vun dat Ganze op 200 kladdert is, denn snackt een vun'n Vegetationsbeginn. Dat Datum is de Dag, an den de 200 överschreden warrt.

Gröönland-tempraturen Vegetationsbeginn
Jahr 2015 202,4 °C 23.03.2015
Jahr 2014 205,1 11.03.2014
Jahr 2013 202,1 22.04.2013

De Tabell wiest, dat de Vegetation in dat kole Fröhjohr 2013 noch 1 Moond later in Gang keem as düt Johr.

Huch, wat is dat, Sommer in Sicht? Bi Tempertuurn twüschen dree un 23° drüppelt Mamertus laues Woter ut sien Boort. Ok de Kohle Sophie güng in Fröhjohrskleed övert Land. Petrus hett de Ieshilligen in Heven beholen to'n Iesblomengeeten!

Wat snacken de olen Buern? "Erst Mitte Mai is de Winter vörbi." Nu künnt de Bohnen in de Eer. De letzten Doog bit Wuchenend: stediges Op-un Dolwedder. Von de Nordsee kümmt Hoch Ulrike. Viellicht hett se Warms in de Bagoosch? Friedrich Hölderlin meent in sien Vers "Di to Freud": As to de Levenstieden, is dat ok mit de Doog. Keeneen is goot genoog, keen is ganz schön, jeedeen hett doch sien Unvullkomenheit. Over reken mol tosomen, so kümmt en Summ Freud un Leven dorut!


Botterblomen töven op Immen

Deep Diethelm bringt uns in de nie'e Wuch. Dat blifft Aprilwedder. To Hölp kümmt Speelverdarver Erik von de Nordsee her. Liekers — gröne Wieschen seht nu geel ut. Hunnenbloom töven, dat Immen un anner Nektarsammler vörbikieken. "Blöhen in Mai de Botterbloom, fangt ok bald de Sommern an."

Wi hebbt Pingsten. Dat letzte lange Wuchenend vör Wiehnachten. Nich mootloos warrn! En Hoch över de Azoren is op Pingsttour mit allerbestes Wedder. Unverhofft kümmt Vadders in de witte Maibüx an. Bi 19° — af in Feld un Flur! Dröppst vergnögte Lüüd, de sik ok an de smucke Natur höögt.

Mit den tweeten Pingstdag sünd wi nu in de letzte Maiwuch. Keen Wedder, dat de Muuschkatt in de Sünn op de Fensterbank liggen kann un vör Behogen snurrt. Ok meern de Wuch grau in grau. Von Wonne nix to marken — dat is Harvstwedder. Ward ok noch nich anners! Dor kümmert sik Deep Gunnar, de sik von de Nordsee ansliekert. Keen Wunner, de letzten dree Maidoog Schuerwedder, mol Sünn, gau wesselnde Wolken un noch ümmer kohle Wind ut W-NW.

Nu nümmt he Afscheed, de Wonnemoond, un de Sommer steiht vör de Döör.


Imm an Johannisbeer

Wedderdoten letzte Moond (in Klammern de Doten vun'n Vörmoond):

  • Dörchsnittstemperatur in 2 m Höchte +10,6°C (Vörmoond +7,8°), dat sünd 1,8°C ünner't Middel.
  • De höchste Temperatur mit +24 C (19,7°) harrn wi an 5. De deepste mit -0,3°C (-2,9°) weer an 3.
  • In'n Dörchsnitt harrn wi 20 cm in de Eer +12°C (8,6°) un 5 cm över de Eer 12°, de deepste Temperatur mit -1,7°C an'n 3. (-4,4°).
  • De Sünn hett sik 195 Stünn (242) an'n Heven wiest.
  • De Solorstrohlung keem in Dörchsnitt op 317 W/m² (338). Se weer an hööchsten mit 1216 W/m² (1051) an 15.
  • An 23 Doog (17) hebbt wi 68 l/m² (22) Nedderslag kregen.
  • Dörch Evapotranspiration sünd 53 l/m² (55) wedder aftrocken.
  • De Wind hett an düllsten mit 53 (38) km/h ut W-NW pustet un keem mit 53% (63) ok ut W-NW.
  • De Moond harr 1 Frostdag (Tmin < 0°C), 1 Kolen Dag (Tmax < 10°C) un 7 Warme Doog (Tmax >= 18°C).


Madame un Monsieur Gröönspecht söökt Mieren (Ameisen). Se seht ganz schön füünsch ut! Argert se sik ok över den kolen Mai?

Mehr Wedder? hartenholmer-wetter.de.


Fotos: Uwe Mohr
1.6.2015


na baven