So weer dat Wedder in Februarmoond

Dat Wedderdaagbook vun Uwe Mohr


Eeen, twee, dree, in Suseschritt / löppt de Tied, wi lopen mit. So seggt Wilhelm Busch. Nu hebbt wi al de letzte Wintermoond tofoten. He heet ok Dau- oder Sneemoond, ok Hornung, wiel dat Veeh in Februar hörnt.


Winterveilchen, Foto Uwe Mohr

"Daumoond" passt ton'n Moondanfang recht good. In de Nacht noch Frost, un an Morgen güng dat mit Dauwedder loos! 3,2°C, dor wern gau wedder gröne Wischen to sehn. Sölbst de Sünn blinzelt af un to dörch de Wolken. Over: "Sünnt sik de Katt in Februor, mutt se in März achtern Oven liggen!" — För de Johrstied recht mild, geiht dat wieder. Bloots nachts is dat koolt mit bit to -5°C.

Is nu over erst mol vörbi. Letzte Nacht keen Frost, un morgens 6,4°C. Dor ward sölbst de gröttste Frostküddel vergnögt. Keen Wedder för de heilige Dorothee, de wannert hüüt, an 6., nämlich gern in Snee. To Anfang von de 2. Dekode is Deep "Ruth" ünnerwegs. Mit Pusterich in Slepp, pust he dat Winterwedder enfach weg.

Hett "Ruth" sik utramentet, steiht Deep "Stephanie" mit milde Luft, veele Wolken un Regen in de Startlöcker. Dennoch, kiek mol in Goorn: Zaubernutt, Sneeglöckchen, Winterlinge un Krokusse hett de Sünn opblöhen loten! Langsom ward bunt in Goorn.


Nich slecht: Herr Specht vör Krokuskulisse. Foto Uwe Mohr

Hölpen deit dorbi ok de Valentinsdag an 14. "An Dag von Sankt Valentin goht Ies un Snee dorhin." Vun Stormdeep "Tini" hebbt wi hier nich veel markt. Nu steiht over Deep Ulla vör de Döör, se hett düchtig Wind un Regen in de Packeloosch. Nich bloots dat, bi 12,3°C fungen de Immen an to flegen. To eer Summen hebbt Meisen, Drosseln un Boomlöper düchtig quinquerleert. Wenn dorto noch Krokusse, Sneeglöckchen un Winterlinge mit eer smucken Blöten in Wind schaukeln, as wull'n se seggen: "Freut ju, dat Fröhjohr is nich mehr wiet!" —

Over denn, Wettermalöör to'n Anfang von de drütte Dekode! Nix as Deeps an Heven: Ulla, Violetta un Waltraud sün door. Wat hebbt se in de Bagoosch? Richtig, milde Luft, Regen un dichte swatte Wolken. Halv England versuupt opstunns ünner solk Wedder!


Februarsünn an'n Elvdiek. Foto ML

Geiht over ok anners. An 23. acht dree veerdel Stünn Sünnenschien von blauen Heven, maximal 9,6°C, man bloots wenig Wind. Ungewöhnlich mild geiht dat wieder. An 26. hett uns Sünn noch poor Schüffeln noleggt. 13,4°C sünd dat worn. Dat hebbt wi over ok Hoch "Friedrich" to verdanken.

Leider hett Deep Yvonne doran keen Gefallen. Se rauscht mit Schietwedder över de Nordsee ran (arm England!) un vermasselt erst mol Fröhjohrsgeföhle. No söös Doog ohn Regen, over mit veel Sünnenschien verlött uns hüüt mit Regen, Dunst un düstern Heven de Februarmoond. He weer — bi uns, nich in England — to dröög, sünnig un veel to warm. Nu is de Winter to Enn, seggt de Metereologen. An 1. März fangt dat Fröhjohr an.

Wedderdoten letzte Moond:

  • De Dörchsnittstemperatur harr in 2 m Höchte 4,4°C, dat sünd 2,9°C övert Middel.
  • De höchste Temperatur mit 13,4°C harrn wi an 25. un de deepste mit -4,7°C an'n 1. Februar.
  • In'n Dörsnitt harrn wi 20 cm in de Eer 3,4°C, un 5 cm över de Eer de deepste mit -5° an 3.
  • De Sünn hett 87,5 Stünn an Heven stohn, dat sünd 90% von't Soll.
  • Solorstrohlung keem op 129 W/m² un weer an hööchsten mit 582 W/m² an 22.
  • Regen an 15 Doog hett 38,2 l/m² geven. Dat sünd 84% von't Soll. Aftrocken sünd dörch Evapotranspiration 20 l/m².
  • De Pusterich hett am meisten mit 18,2% ut O-SO weiht un am düllsten mit 56,2 km/h (7 Beaufort) ut O-SO an 7.
  • De Moond harr negen Frostdoog (Tmin < 0°C) un eenuntwintig kohle Doog (Tmax < 10°C).

Mehr Wedder gifft dat hier: hartenholmer-wetter.de.


2.3.2014


na baven