vun Meike Balzer-Fraun

"Wir haben super gelernt, das Wasser schnell loszuwerden. Was wir bisher nicht so gut konnten: es vor Ort zu halten." S. Grußdorf, Leiter des Forstamtes Ahlhorn, Bremer Nachrichten, 11.08.26

An't Enn vun Juli 2023 heff ik bi Nacht un Starkregen en Vörrichten installeert, womit ik ahn elektrisch Pump Water ut'n Diek rut in'n Vörgoorn lopen laten kunn.
Anners harrn wi dat Water inne Stuuv hatt. De Dränaagerohren för Regenwater weren dichtwussen un mussen nie maakt warrn.

Löppt! Allens wunnerbor! Jeedeen Druppen Regenwater blifft op't Grundstück, nix is versegelt, un dat Water vun een Siet vun't Dack löppt in uns ‚Zisteern', en ole OMS-Groov, de wi to'n Glück siet 30 Johren nich mehr för Schietwater bruukt.
Mehr köönt wi nich doon, "das Wasser vor Ort zu halten".

Anfang August 2026. To'n Glück sünd all de sworen Dunnerwedders över un ünner uns vörbitrocken. Man nu is dat sowat vun dröög, as wi dat noch nie nich beleevt hefft. Sogor de Zisteern is middewiel leddig. Naja, wi kunnen uns dat leisten, 800 Quadratmeter mit Leitungswater to watern, man dat's ja nich to verantworden.

Also mutt ik mi en "Waterspoormanagement" överleggen:

• De heemschen Büsch un Bööm, de Heck un de Rosen kaamt alleen kloor.
• De Küvenplanten aver, de ik in Pött verbannt heff, köönt sik sülvst nich hölpen. Se kriegt eerst mal Water. Op lange Sicht mutt ik se woll ümplanten.
• Bi de Tomaten un twüschen de Stangenbohnen heff ik al in't Fröhjohr Blomenpött inbuddelt. So kann ik mit de Geetkann watern, ahn dat wat överhen löppt, un de Wutteln hefft bitieden lehrt, wo se Water findt.
• De Grööndünger Phacelia in de afoornt Kantüffelbeden warrt so lang sprengt, bet de lütten Planten Foot faat hefft. Ok mien Krüderbeet laat ik nich dröög warrn.
• De Pött mit de Afleggers vun mien Fründin ehr frostfasten Rosmarin un Salbei, de ik sorgsam heegt un pleegt heff, staht nu op de Schuuvkoor. So kann ik de mobile Kinnerstuuv heel simpel an passlich Plätz kutscheren: Sünn, Schadden, Windschuul. Vun allens 'n beten, vun nix to veel. Düsse Planten sünd Uttuusch för dat, wat verleden Winter verfroren is.

De Schuuvkoor as Planten-Kita

• De Kompostbulten bruukt nu af un an 'n beten Water. Fuchtig Rasenschnitt gifft't ja grad nich.
• Ok uns Diek warrt opfüllt. För Vagels, Molche, Libellen, Immen, Hummeln un allerhand Krabbeldeerten sünd dat Water un vör allens de Blutweiderich en Droomland.
• De Fingerhoot, de sik so malensweert blangen de Huusdöör breet maakt, kriggt jümmers de Resten ut miene Waterbuddel, wenn ik na Huus kaam, un de grote ole Hirschzungenfarn lieköver de Kökendöör warrt dank dat Water, dat bi't Waschen vun Grööntüüch anfallt, överleven. Dat heet, ik wasch dat letzttiets in'n Ammer un bring dat Water rut.

Ik glööv, so is dat to verantworden. Un denn töövt wi mal, wo de Goorn tokamen Fröhjohr utsüht. Villicht is de Winter ja ok wedder mal to natt.
Een Vördeel hett de Dröögte: De Giersch maakt slapp, un dat is nu heel licht, dorvun mal so'n beten wat in de Biotünnn to verfrachten. Gifft Platz för ‚hitzeresistente' Planten.

De Tomaten kriegt ehr Water porschoonswies per ingraven Pott!

To veel Gewees üm mien lütten Goorn? Mag woll ween, man ik glööv, jeedeen mutt sik nu endlich mal Gedanken maken, wo een mit de Folgen vun den Klimawannel op sien lütt Rebeet ümgeiht, ahn allens noch leger to maken.

Dat will seggen, wenn "Watermanagement" heet, dat de Politikers de Waterstraten deper buddeln wullt, dormit de Schippsverkehr beter löppt, denn sünd wi heel un deel in'n Moors!
Denn kann ik miene 800 Quadratmeter ok watern un mi jeedeen Dag stünnenlang ünner de Bruus stellen.

Wo heet dat doch al in de 1960-er Johren? "Save water — shower with a friend!"