Frohe Wiehnacht!
|
Dat Festeten
vun Antje Heßler
Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Poor Daag vör Wiehnachten keem mien Hölp mit en ganz besünneres
Wiehnachtsgeschenk an. Se harr mitkregen, dat ik mi veel üm de
Vagelwelt
in mien Goorn kümmer. Ut ehrn Korv haal se en groot Paket un
stell dat vör mi up den Disch. En sülvstbackten Koken schimmer
dörch de Kloorsichtfolie.
"Oh wat schöön, se hebbt för mi enen Koken to
Wiehnahten backt! Denn mütt ik kenen mehr köpen!"
Se lach fröhlich. "Nich för se, nee för de lütten
Vagels heff ik enen Koken backt!" Dor wöör ik eerst
wies, dat de Koken ut luder Sünnenbloomkoorns un Appelschieven
bestünn. Dat weer ja en Festeten för de Vagels!
Mit Appelschieven bavenop! De Wichtel wöörn
opleevst sülven togriepen...
Pottslaan! Wokeen finnt den Koken?
|
Wat dat wull afgifft, wenn ik den Koken na buten stell? Up den Lünkendisch
weer de richtige Placken för em. Dor kunnen de Vagels dat Wunnerwark
vun Koken goot bekieken. In Gedanken sehg ik de velen Lünken,
Meisen un Amseln üm den Lünkendisch flegen. Aver ok de groten
Duven wöörn sik över dat Foder hermaken. Dorüm
stell ik den Teller mit den Koken eerst gegen Avend in'n Schummern
na buten. Över Nacht stülp ik en groot Sieb över den
Leckerbissen. So kunn ok Navers Katt nich an den Koken.
"Hm, gifft dat hüüt etwa nix?"
"Nanu, wat is dat da baven?"
|
Annern Moorn keem de grote Momang. Ik nehm dat Sieb vun den Koken
un sett mi in de Stuuv achter de Schiev. Na'n ganzen Stoot kemen de
eersten Amseln anflagen. Se kreisen üm den Koken un keken sik
mißtruisch dat Wunnerwark an. Sehg ut, as wenn se seggen wullen:
"Sall dat grote Ding för uns sien?"
Een Amsel lann sogoor up den Lünkendisch, floog aver glieks
wedder weg. Ok de annern lütten Vagels harrn keen Totruun in
dat Festeten!
Villicht nu?
Dor
heff ik den Koken an de Eer stellt. Wedder nehm en Amsel den Kraam
in Ogenschien. Mit den gelen Snavel na vöörn güng se
up den Koken daal. Aver koort vörher stopp se mit beide Been
af un güng en ganzes Enn trüchwarts. Denn nehm se den tweeten
Anloop na den Koken. Wedder geev dat dat glieke Speelwark. Dat passeer
noch eenige Male. Wat weer blots mit den Koken los. Harrn de Vagels
Angst vör den Leckerbissen? Oder weer he villicht to groot? Ok
de annern Vagels leten sik nich blicken.
"Hmmm... kannst dat eten?"
"Nee, lever doch nich!"
"Oder...?"
Also de Appelschieven hebbt se eten
weern dat de Wichtel?
|
Ik heff denn en groot Schiev ut den Koken rutsnäden un dorneven
leggt. Nu keem en vun de Amseln al wat neeger. N'poormal hett se sik
sogoor en lütt Koorn rutpickt. En anner möök sik an
de Appelschieven. Aver vunwegen Festeten, dorvun kunn keen Reed ween.
Ok de Duven leten sik nich blicken.
Denn heff ik den Koken up den Rasen stellt. Un süh dor, en Duuv
weer glieks to Stell un möök sik över den Koken her.
Se harr keen Bang.
Hüng dat Verhollen vun de annern Vagels doch mit de Grööt
tohoop? Weer de Koken för de lütten Vagels to groot? Dat
is, glööv ik, de Lösung.
"Woso, dat Dings is doch nau mien Kaliber!"
Poor Daag later:
"Na? Ik heff doch seggt, ik krigg dat
Ding lütt!"
Nadem de Koken lütt un uteenanner maakt weer, kemen
ok de annern Vagels to'n Freten. Besünners de Duuv leet sik dat
ümmer wedder goot gahn. De Töller weer al meist leer.
Un Tschüß!
|