Dat China- Kernmodul Tianhe is in den Erd-Ümloop

van Ludgerd Lüske


Dei Biller käönt Se per Klick vergröttern!

Dat Kernmodul "Tianhe" is an'n 29. April 2021 van den chineeschen Ruumfaohrt-Baohnhoff Wenchang ut in't All flaogen. China mellt, dat dat Ruum-Fohrtüg nu in den Erd-Ümloop in 380 km Hööchte is. Dat is ein relativ siede Hööcht. Dei ISS flügg bloots wat minne höger in 420 km Hööchte.


China-Weltruum-Station, Modell. Bild-Daoten: Wikimedia

China is mit den Bau van siene eigen Weltruum-Station in'n Gang kaomen. Eine Rakete van den Typ "Lange Loop 5B" steeg an'n 29. April 2021 mit dat Karn-Modul van dei Weltruum-Station van den Ruumfohrt-Baohnhoff Wenchang up. Dat 22 Tonnen schwore Modul "Tianhe" ("Himmlischke Harmonie") is dat Hauptdeil van dei Ruum-Station, dei 2022 fardig wern schall.

Nao teihn Minuten sprüng dat Modul van dei Rakete aff. Wat läöter güng Tianhe in den vörseihn Erd-Ümloop. Tianhe is 16,6 m lang un hätt einen Dörmäter van 4,2 Meter. Et is dat gröttste Ruumschipp, dat China bit nu hen bawde. Drei annere Ruumschippe käönt gliektiedich andocken — tweie uck för eine längere Tied. Dat Karn-Modul sorgt för Strom un Andriew un hätt Waohnstäen för drei Astronauten, dei rund sess Maonde an Bord bliewen käönt. Twei ähnlick groote Module för Wätenschkup-Experimente schäöllt noch in T-Form anbawt wern.


Dei China-Weltruum-Station mit Beschriften in Oginaolspraok. In alle Richten staoht dei Sünnenseils af.

In dei taukaomen Wäken plaont China noch twei neie Starts duune achternanner. In'n Mai kunn al dat Cargo-Ruumschip "Tianzhou-2" mit Driewstoff un Material för dei Versorgung andocken. Drei Astronauten schäöllt an Bord van "Shenzhou-12" vellicht in'n Juni nao Tianhe fleigen. För dei Upbau is dei Fleigplaon stramm organiseiert: Ölf Starts sünd plaont för dat Tausaomeschruuwen van dei heile Ruum-Station — drei Starts mit Module un veier mit Lüe an Bord.


Tianhe-1 Karnmodul in'n Baw. Bild-Daoten: Nasaspaceflight


Süh: Nasaspaceflight
un: Chinesischke Ruumstation - Wikipedia

2.5.2021


na baven