Perlen

Vörstellt vun Anke Nissen


To'n Anhören hier klicken:

Lesen deit Anke Nissen in holsteiner Platt.

Natuur un chemisch Tosamensetten:

CaCO3 = Kalziumkarbonat (89 bet 92%), ähnlich as Perlmutter.
Perlen sünd en Geschenk vun 't Meer.
De Perle warrt al jümmers to de Edelsteen tellt, dorbi is ehr Ursprung organisch.

Härte:

3 bet 4 (Diamant hett de Härte 10)

Vörkamen:
Funnen warrt Perlen an de Küst vun 'n Indisch Ozean, in'n Persisch Golf, an de Küsten vun Australien, Japan, Zentralamerika
Farv un Utsehn:

ene Perle is meist witt, se kann aver ok rosa, gries, swart, licht geel, licht gröön sien. Se is undörchsichtig orrer dörchschemernd.


Geschichte

Perlen sünd en Geschenk vun 't Meer, as ik al seggt heff. Se bildt sik in de Perlmuscheln. Wenn sik dor en Fremdkörper, as Bispill ein lütt Sandkorn, inlagert, denn sondert de Muschel vermehrt kohlensaures Kalk af, dorto ene Substanz, de beten wat as Horn un klevig is (Conchyn). Dormit warrt de "Eindringling" ümhüllt, Laag üm Laag. So entsteiht de echte Meeresperle. De Perle is also dat Ergeevnis vun en Afwehrreaktion vun de Muschel, meist so, as bi en Minschen sik Eiter üm en Fremdkörper billen deit. Bloots dat de Muschel nich ophöört un de Perle jümmer grötter warrt. De arme Muschel mutt sik bi dissen Vörgang föhlen, as harr se en Football in'n Buuk. Un de vele Perlsubstanz to billen kost ehr wiss bannig Kraft.

Bi de Zuchtperle warrt de Vörgang dordörch fixer maakt, dat man enen gröttern Fremdkörper — enen Kern — in de Muschel ringifft.


Echte Perlen up Hortensienbläder. Fotos: Anke Nissen

Un denn gifft dat ok noch Flussperlen. De sünd in ehre Form oft bizarr un recht ünnerscheedlich, also afwechslungsreich. Se hebbt ünnerscheedlich Farven.


Flussperlen op en Hortensienblatt. Foto: Anke Nissen


Flussperlenkeed

De Glanz — de Lüster — vun de Meeresperle is aver veel, veel schöner as bi en Söötwaterperle.

Perlen sünd al in de Antike as Smuck dragen worrn. Man hett de Perlen dörchbohrt un up Schnüre upreiht.

Perlen warrt jümmers schöner, je mehr se dragen warrt. Hett en Minsch aver dullen Kalziummangel, dann köönt de Perlen bi 't Drägen stumpf warrn un seht denn nich mehr goot ut.


Dunkle Perlen. Foto: Anke Nissen

Wirken un Legenden


Perlen maakt Fruuns schön. Foto: Anke Nissen

Hillig Hildegard vun Bingen erwähnt in ehre Lehre vun de Heilsteen de Perle, man vun en Heilwirken vertellt se nix.

De ollen Griechen hebbt de Perle Aphrodite weiht, dat is de Göttin vun de Schönheit un vun de Leevde. Se sään, alle beid, de Göttin un de Perle, sünd "meerboren". Un se sään ok, dat de Göttin ehre typisch Attribute, nämlich de Schönheit un de Leevde, an de Perle wiedergeven hett.

De Perle kann de Schönheit vun en Fru fördern un bet in 't hoge Öller bewohren.
De Perle kann de Leevde entflammen un höden.
De Perle kann Kummer un Sorg fernhollen. —

De Perle symboliseert: Ehrlichkeit, ok Ehrlichkeit gegen sik sülms.
Se symboliseert aver natürlich ok: Schönheit, un dormit verbunnen Reinheit.

De Perle is de Monatssteen vun 'n Juni. De Lüüd, de in 'n Juni up de Welt kamen sünd, de köönt aver wählen, wat se de Perle orrer lever den Mondsteen as ehren Schutzsteen hebben wüllt.

"Perlen bedüüdt Tranen"

Ik heff mal beleevt, as ene Fru to ehren Mann sä: "Worüm hest du dat daan?", dor harr he ehr ene wunnerfien — wohrschienlich kostbor Perlenkeed — schenkt. He keek ehr tehmlich ratlos an. He wüss nich, dat se de Meen weer: "Perlen bedüüdt Tranen".

Dat gifft Perlen — wunnerschöne Perlen —, de sünd nich rund, de sünd oval, seht ut as grote Drüppen. Un so is man villicht dorto kamen, Perlen mit Tranen in Verbinnung to bringen. Maria Stuart as Bispill, de harr en prächtig Halsschmuck, de ut söß Keden mit je 25 drüppenförmig Perlen bestünn. Wi kennt ehr Schicksal: veel Tranen, veel Unglück, un toletzt enen fröhen Dood.

Friedrich Rückert — en romantisch Dichter, de 1788 up de Welt kamen is — schrifft vun de Perlen as "Engelstranen". Hübsch, so meen ik.

Ik sülm drääg kene Perlen, ik heff gor kene Perlen.
Worüm?
Ik weet dat nich.
Ik find dit "Wunner" vun de Natur nämlich wunnerschöön.


23.12.2010


na baven