Krüüzsteen

 

Krüüzsteen

Vörstellt vun Anke Nissen


Namen:
Chiastolith (Schiastolith) = Hohlspat, warrt funnen in Argentinien;
ok "Andlusit", warrt funnen in Andalusien.
Wenn de Steen gröön faarvt is, warrt he "Vicidin" nöömt.
Fundsteden:
Andalusien, Bimbowrie (Australien), Tirol, Murzinka (Ural), Minas Gerais (Brasilien)

Chemisch Natuur:

Aluminiumsilikat (Al2SiO5),
metamorphes Mineral, rhombisch bipyramidal

Härte:
7 - 7,5 (Diamant hett de Härte 10.)
Verwandtschap:
  • De Mineralien Disthen un Sillimanit hebbt de lieke chemisch Tosamensetten, se hebbt aver anner kristalline Formen.
  • Zyanit is en blaag Abart vun'n Disthen.
  • Rhätizit is de witt/griese Abart vun'n Disthen.
  • Fibrolith is en Vermischen vun Sillimanit mit Quarz.

Ik will hüüt en beten vertellen vun den Krüüzsteen, dat is de Chiastolith, de krüüzförmig dörchwussen is. Dorwegen hett he ok sienen Namen kregen: De Querschnitt vun'n Krüüzsteen wiest en düüster Krüüz up hellen Grund. Dit Krüüz süht so ähnlich ut, as de griechisch Bookstaav "Chi" — dorwegen de Naam Chiastolith.

Krüüzsteen

Blots de Chiastolith bildt dit Krüüz. Dat kümmt dörch en besünner Kahlenstoff-Inlagern.
Blots dissen Steen hebbt de "Krüüzritter" as Amulett — as Talisman — bi sik dragen, wenn se in't Hillig Land trocken sünd.
De Steen weer dormals bannig düür, he gell veel, he weer veel wert!

De Chiastolith weer in den Wallfahrtsort Santiago de Compostella al bekannt, bevör in Andalusien — bi Almeria an de Süüdküst vun Spanien — de Andalusit entdeckt worrn is.

Man hett glöövt, wenn en Steen dat Krüüz in sik hett, denn mütt dat groot Kraft bedüden. Dorüm hebbt de Minschen den Krüüzsteen geern bi sik dragen, un besünners geern natüürlich up Wallfohrten.
An de Wallfohrt-Orten wörr de Krüüzsteen as heilkräftig Steen verköfft.

Krüüzsteen. -- Klick op to'n Vergröttern!

Miene — na de Meen vun mienen leven Mann — "Hexenböker" seggt:

  • De Krüüzsteen kann mööd un gestresst Minschen aktiveern, to Kräften bringen.
  • He wirkt günstig up Lüüd, de dor an liedt, dat se sik verfolgt föhlt.
  • He nimmt dat Bangsien.
  • He kann Ruh un Freden bringen.

Ik sülms heff de schöönsten vun miene Krüüzsteen verschenkt. Nu photographeer ik de, de ik noch heff, dat Se alltohoop sehen köönt, wat för'n erstaunlich Steen de Krüüzsteen is.
Un wenn ik disse besünnern Krüze ankiekt — Krüze, de vun de Natuur fast in Steen schreven sünd —, denn kann ik verstahn, dat de Lüüd in fröher Tieden in dissen Steen en ganz groot Bedüden, en ganz groot Kraft rindacht hebbt.

Krüüzsteen. -- Klick op to'n Vergröttern!



na baven