Koralle

Vörstellt vun Anke Nissen


Natuur:

Korallen sünd en Oort "Blomendeerten".
Se sünd dat organisch Produkt vun Seedeerten ut warme Meere, de to de Grupp vun de Polypen rekent warrt. Se sünd de kalkhaltig Gerippe (Kalk-Skelette) vun disse lütten Meeresdeerten. Meist sünd se to enen Stock tosamenwussen. Se wasst langsam, över vele dusend Johr. — Dordör, dat se nich vun Vulkane un Sedimente, sünnern vun levige Wesen maakt warrt, sünd Korallen also en ganz besünnere Aart "Steen".

Vundaag sünd vele Korallenriffe vun den Dood bedrauht dör dat Ophitten vun de Eer, dat ok de Grote See to schaffen maakt. Wenn dat Water to hitt orr to suur warrt, starvt de Koralln af un laat bloots ehr witten Skelette torüch ("Korallenbleiche").

Chemisch Tosamensetten:

CaCO3 , dat is Calcium-Carbonat

Härte:
3-4 (Diamant hett de Härte 10.)
Farv:
root, rosa, witt
Vörkamen:
Mittelmeer, Golf vun Biskaya, Malaische Archipel, Japan

Woher de Naam "Koralle" stammt, dorför heff ik twee Erklären funnen:

  1. vun dat griechisch kura halos (korállion) wat soveel bedüüdt as "Meerdeern" (Meermädchen),
  2. vun dat hebräisch goral, un dat bedüüdt "Los-Steinchen". Fröher wörrn in Kleinasien, Palästina un an't Mittelmeer Korallenstücke as Orakelsteen bruukt.

Geschichte

De Koralle speelt en wichtig Rull as Smucksteen un as Amulett (sall Schaden verhindern) — ok in de Magie.

De Koralle is al in die Bronzetiet bruukt worrn.

In't Altertum kennen de Lüüd de Koralle vör allem as Amulett för Kinner, dat sull en Schutz sien gegen böös Geistervolk, gegen den bösen Blick.

Paracelsus hett de Koralle as Töversteen beschreven.

In Ägypten sünd Korallen oft bi Utgraven in Gräver funnen worrn (as Grabbeilagen), de Korall gell as magisch Schutz för Dode up ehren Weg in't Dodentiek.
De levigen Lüüd hebbt de Koralle as Schutz-Steen mit sik föhrt, wenn se up Reisen weern. De Dänzerinnen hebbt Korallen as Amulett dragen.

Koralln-Aarten, ehr Wirken un Legenden

In de griechisch Mythologie heet dat: As de Held Perseus de Medusa den Kopp mit all de Schlangen afhaut hett, sünd Drüppen vun ehr Bloot in dat Meer sprütt un dor denn to rode Korallen worrn.

Noch hüüt gellt de Koralle bi de Lüüd in Tibet un bi de Indianer as "Hillig" Steen.

In Süd-Düütschland kennt man dat "Wehenkrüüz", dat sall de Fruun bi en Geburt de nödige Kraft geven. Dat is en Krüüz ut Malachit. Wenn dat aver tohoop mit Korallen arbeidt worrn is, denn sall dit Krüüz ganz besünners veel Kraft geven.

Ik kenn vun fröher:

  • Lütt Kinner kregen Korallen-Keden üm den Hals, dat sull maken, dat se bi't Tähn-kriegen keen Smarten harrn.
  • Ok weer man de Meen, dat dat Dregen vun Korallen-Keden vör Utslag, Epilepsie un Kopp-Pien bewohren kunn.

Up de Mineralien-Messe in Hamburg hett en Fründ för mi enen groten Korallen-Anhänger köfft. Ik dreeg den an en infaarvt Siedenband. He is ut Schaumkoralle.
Wurzel- un Schaumkorallen sünd bi't Herstellen vun Schmuck en Ersatz för de Edelkoralle. Se kaamt in groot Mengen ut China un Japan. Se sünd groot, weegt licht un sünd nich so düür.

Wurzelkorallen (Wörtelkorallen) sünd en Korallenort för sik, se sünd aver keen Wörtel, se sünd en besünner Korallenstruuk, de oft mit de Schaumkoralle verwesselt warrt.
Schaumkoralle warrt de Dele vun de japaanisch Momo-Koralle nöömt, de in'n Sand orrer Schlick steken un de den Övergang vun den Korallenfoot to de fasten Dele vun den Korallenstocks bilden.
De Schaumkoralle is al lang in'n Handel, se is sworer as de Wörtelkoralle un ok en beten dürer.

Un in de Karibik warrt Talismane un Amulette ut swarte Korallen maakt, de — so glöövt de Lüüd dor — negativ Energien absorbieren un so den Minschen vör Schaden bewohren köönt.

En Fründ vun uns kreeg ene swarte Koralle schenkt, de stamm vun ene Schamanin ut Chile. För mi weer de wat Nieges. Ik harr noch nie ene swarte Koralle sehn. Uns Fründ hett mi denn vertellt:

De Swarte Koralle gifft de Aura vun uns Minschen Schutz, dorüm is se en wunnerbor Schutzsteen för Schamanen und Lüüd, de mit Kranke to doon hebbt (Schwestern, Pfleger, Heiler...).
De Swarte Koralle sall ok en Schutz wesen vör Krankheiten, de dat Immunsystem angriept, ja se sall sogoor en starken Schutz wesen vör Krankheiten, de as unheilbor gellt.
En Heiler kann mit de swarte Koralle veel Godes bewirken, en Künstler kann mit ehr veel feine Saken schaffen — orrer sik anregen laten. Man beide, de Heiler un de Künstler, köönt dat blots denn, wenn se dat nich ut Eigennutz, ut Bereknung doot.
Swarte Korallen sünd Lichtbringer, dörch se warrn olle Wunden un Leid in Starksien un Leevde wannelt.

De Koralle symboliseert Freud.
Se wiest uns, dat ok in de faste, starre Form Leven un Bewegen vörhanden is. Dorüm kann se helpen gegen Depressionen. En Keed ut rosa Korallen kann dat Hart ruhig warrn laten.

De Koralle höört as Meeresdeert in Neptun sien Riek. Dorüm erinnert uns de Koralle an enen gesunden Krinkloop, as

  • Flut un Ebbe,
  • Inatmen un Utatmen,
  • wat upnehmen un wat afgeven...

De Koralle bringt Harmonie, Schönheit, Reinheit in uns.
Se lehrt uns, uns Leven mit Freud to meistern,
uns sülvst to kennen, uns sülvst so to sehen, as wi sünd.
Se lehrt uns, to öven, dat wi uns sülvst leev hebben köönt, üm nastens denn ok unsen Naver leev hebben to können. (Dorbi kann ik denn natürlich gor nich an dat Wort ut de Bibel vörbidenken: Heff dienen Nächsten leef, as (ok) di sülvst!)

Mien Grootmudder hett mi as Kind ene Korallen-Keed schenkt, rosa, ästelig. Ik heff de in junge Johren oft un geern ümhatt. Wat mien Oma dat nu allens wüßt hett, wat ik baven över dat gode Wirken vun Korallen schreven heff, dat weet ik nich, — man dat mien Oma dat goot mit mi meent hett, dat weet ik.


Ut "Van den eddele ghestenten", en Handschrift ut Dresden ut dat 15. Johrhundert:

Een sten de hetet koral,
de is roed averall.
ene hande krut ynme mere stat
dat sulve korte blede hat:
so men dat bringet ant lant,
so wert et hart altohant
unde wert to enen stene gud,
roet rechte alse en bloed,
nochtent was id int erste grone.
Dar wert de man van kone
Unde mach to aller stund
wol varén unde syn ghésung.

Hoochdüütsch:

Ein Stein, der heißt Koral
der ist rot überall.
Eine Art Kraut im Meere steht,
dasselbe kurze Blätter hat:
wenn man es an Land bringt,
so wird es hart alsobald,
und wird zu einem Stein, der ist gut,
richtig rot, wie aus Blut,
dennoch war er anfangs grün.
Davon wird der Mann kühn,
und er ist zu jeder Stund
wohlhabend und gesund.

In't Plattdüütsch bröcht vun Ludgerd Lüske:

En Steen, de heet Korall,
is root, överall.
So en Kruut steiht in't Meer,
et hett so korte Blöör,
bringt een dat an Land
warrt et hart all in'ne Hand,
un warrt en Steen, de is goot,
wohrhaft root, as ut Bloot,
aver gröön füng de an.
Risch maakt de den Mann,
un hei is in jedeen Stund
riek un ok gesund.

Översetten in de oginaal südollenborger Fasson: hier!



na baven