Foto: A. Nissen

 

 

Jasper

Vörstellt vun Anke Nissen


Natuur un chemisch Tosamensetten:

Jasper (orrer Jaspis) höört to de fienkristallin — mehrst körnig — Utbilden vun de Quarze.

De Steen besteiht ut SiO2 (= Kieselsäure) un ünnerscheedlich Tosätze, as Mineralien, Oxide, Hydroxide, Eisen, Mangan un anner organisch orrer anorganisch Substanzen.
Je nadem, wat dor binn is, kümmt Roter Jaspis, Landschafts-Jaspis, Bilder-Jaspis u.a. tostann.

Härte:

7 (Diamant hett de Härte 10)

Spezifisch Gewicht:

üm un bi 4 g/ccm
Vörkamen:
Indien, Ural, Afrika, USA, Düütschland
Farv un Utsehn:

Jaspis is jümmers undörchsichtig. Dat gifft:

  • Jaspis in root (SiO2+ Fe2O3, also Kieselsäure + Eisenoxyd)
  • Jaspis in bruun (SiO2+Manganoxyd),
  • Jaspis in geelbruun, geel (SiO2+Eisenoxydhydrat),
  • Jaspis in gröön, gries, swart — also in meist all Farvtöön.
  • Oft hett de Jaspis Striepen. De begehrtest Farv is Root.

Varianten

Ut Kieselsäure bestaht vele bekannte Smucksteen, nämlich all de Quarze:


Jaspis mit Bänder. Foto Anke Nissen
  • Kristalliseert Utbillen vun de Quarze:
    • Bergkristall (ok mit Rutil-Inslüsse)
    • Citrin (hell bet güllengeel)
    • Rauchquarz
  • fienkörnig Utbillen:
    • Chalcedon (hellblaag)
    • Karneol (vun geel bet blootroot)
    • Achat un Onyx
    • Sarder (licht bruun)
    • Chrysopras (appelgröön)
    • Jaspis = SiO2 + Tosätze (geelbruun bet root). Se sünd dichte Aggregate.
    • Plasma (jaspisgröön)
    • Heliotrop (loochgröön mit rode Placken)
  • groffkörnig Utbillen:
    • Aventurin (hett Inslüsse vun Glimmer, dorher güllen-schimmern)
    • Quarz-Katzenauge
    • Tigerauge,
    • Falkenauge
    • Prasem
    • Rosenquarz
  • amorphe Kieselsäure:
    • Opale

     


    Gröne Jaspis


Leopardenjaspis. Foto Anke Nissen

Jaspis is half dörchscheinend bet opak. He kann

  • eenfarvig sien,
  • kann Bänner in sik hebben (bändert) = Landschafts- orrer Billerjaspis
  • kann Plackens in sik hebben (sprenkelt) = Leopardenjaspis (Leopard Skin)

De griese Jaspis warrt oft blaag infaarvt un denn "Düütsch Lapis" orrer "Schweizer Lapis" nöömt. De Naam is nich korrekt.
De rötlich Variante warrt ok Silex nöömt. De Naam is korrekt.

Legenden

Vele edle Steen hett man vun Oldingstieden her övernatüürlich Kräft toschreven. Dat gellt ok för den Quarz un siene velen Variationen. So gellen de Steen as Bispill as Schutzsteen gegen alle Ort Gefohr, se sullen maken, dat de Minsch nich krank wörr, se sullen heilen, se sullen ehre Besitzer mit besünner Gaben un Fähigkeiten utstatten.


Amulett ut Jaspis. Foto Anke Nissen


Tiger-Jaspis. Foto Anke Nissen

Man hett de Steen in de Astrologie de Gestirne un Planeten to Siet stellt; un so sünd denn de "Maandsteen" (Monatssteen) entstahn un ok de "Steen för de Tierkreiszeichen".

In 't olle Ägypten weer de Jaspis de Göttin Isis weiht. De Steen stünn in den Ruf, dat he Kraft för de Gedanken geven kunn.

De Jaspis sall negative Kräfte upnehmen un so kann he di vör enen Apldroom bewohren
De Jaspis symbolisiert Willenskraft. He kann also unsen Willen stark maken, besünners aver den Willen to dat Gode.

In de Bibel höört wi vun den Jaspis in de Apenbaarn vun Johannes. He snackt över dat Himmlisch Jerusalem:

Apenbaarn Johannes 21, 8 -20:
Un de Muur weer buut ut Jaspis...
Un de Grundsteen vun de Muur sünd mit allerhand Edelsteen smückt.
De eerste Grundsteen is en Jaspis,
de anner en Saphir,
de drüdde en Chalkedon,
de veerte en Smaragd
de föffte en Sardonix,
de sößte en Sardion,
de sövente en Chrysolith,
de achte en Beryll,
de negente en Topas,
de teihnte en Chrysopas,
de elfte en Hyazinth,
de twölvte en Amethyst.
Un de twölv Dore weern twölv Perlen...


Leopardenjaspis. Foto Anke Nissen

2. Moses, 28, 15-21:
Dat Amtschildlein sallst du maken na de Kunst...
Veereckig sall dat sien...
Un du sallst dat füllen mit veer Regen vull Steen.
Die eerste Reeg sall sien Sarder, Topas, Smaragd
de anner en Rubin, Saphir, Demant;
de drütte en Lynkurer, Achat, Amethyst;
de veerte en Türkis, Onyx, Jaspis...

In de olle Dresdener Handschrift ut dat 15. Johrhunnert warrt ok vun den Jaspis schreven:

Van den eddele ghestenten
= Vun de edelen Gesteinen.

De eerst, de heet Karfunkelsteen
Sapyrus is de tweet
De drütte is en Jarchant
De veerte is en Kristall
De föffte Steen heet Aghaed [Achat]
De sösste is en Amethisre
De sövente is en Krisolith [Chrysolith = Olivin]
De achte heet Onichilus [Onyx].
De negente is Jaspis nöömt
De 10. Steen heet Diamant
Der 11. heet Sardius un is root [Sarder]
De 12. heet Rubin


Foto: Anke Nissen

De neghende is jaspis nöömt [original Spraak]:

135 De neghende ist jaspis ghenant,
den vynt men in mennighen lant
unde is van mennigher verwe;
de grone is also ene gharve,
de is de beste an syner ard
140 unde schal myt golde syn vorspart.
de sten bot den reden,
de sik bestrickt darmede.
en wiff de en over den vingher haet
unde kyndes an arbeyde gad,
145 wanme er den sten in de hant ghit,
so gheneset se in korter tyd.
unde des is ok de sten gud,
dat he vordrivet dat bloet
en der nesen unde an den wunden:
150 darna in korten stunden
wan he ene nympt an de hant,
so besteyt dat blot altohant.
we enen vyent dot sloghe
de wile he den sten droghe,
155 de blodde nummer nycht en har -
dat wetet wol alvorwar -
de wile he levede unde scholde leven,
wurden em ok dusent wunden gheven.

Hoochdüütsch: Der neunte ist Jaspis genannt:

 

 


Glas vull Jaspis

 

 

135 Der neunte, der wird Jaspis genannt
Den findet man in vielen Ländern.
Und er ist von vielerlei Farbe.
Der Grüne ist wie eine Garbe,
der ist der beste seiner Art
140 und muss mit Gold erspart sein.

Der Stein hilft demjenigen sofort
der sich damit bestreicht.

Ein Weib, das ihn am Finger trägt
während sie ein Kind zur Welt bringt
145 wenn sie den Stein in die Hand bekommt
so geneset sie in kurzer Zeit.

Und dafür ist der Stein auch gut,
er vertreibt das Blut
an der Nase und an Wunden:
150 Danach, in kurzer Zeit,
wenn ihn jemand nimmt in die Hand,
so steht das Blut völlig.

Wer einen Feind totschlägt,
während er den Stein trägt,
151 der blutet kein bisschen, dessen seid gewiss —
das ist wirklich und wahrhaftig wahr —
derweilen er lebt und leben wird,
würden ihm auch tausend Wunden gegeben.

Ik heff enen Jaspis, enen interessanten Jaspis. Dat is en röötlich-bruun Anhänger mit en lütt güllen Platt ünnen un en güllen Anhänger baven. Schenkt kregen heff ik den vun mienen Grootvadder Christian. Bet dorhen harr he dissen Jaspis jümmers — tohoop mit sien Taschenklock — an en güllen Uhrkeed bummeln.


Amulett ut Jaspis. Foto Anke Nissen


2.5.2010


na baven