Calcit — Sünnensteen vun't Leven

Vörstellt vun Anke Nissen

To'n Anhören hier klicken:

Lesen deit Anke Nissen.

Chemisch is Calcit en Verwandten vun'n Kalk.
Calcit = Kalkspat = Kalksteen = Kalziumkarbonat = CaCO3

De Foormen, in de sik Kalziumcarbonat wiest, sünd Legioon. De Stoff kann op mennig Aarten kristalliseern. Calcit is de Foorm, de dreekantig Kristalle bildt. Calcit gifft dat veel up de Welt, dat is een vun de Mineraaln, de in de Eerdkruste sünnerlich veel to finnen sünd. He kümmt dorbi ok as Tomengeln in anner Gesteen vör, so as Marmor un Onyx.

Wieldat sik Kalziumcarbonat good in Water lööst, gifft dat de Todaten för Calcit meist överall, woneem dat Water gifft; un wenn dat Water verdröögt orr verdampt, blifft Kalziumcarbonat trüch. Dat is nämlich ok de witte Schmodder in den Waterkoker. Wenn dat Verdampen langsamer geiht, kann sik de schön kristalline Calcit billen. Ut düt Material sünd t.B. de Stalagtiten un Stalagmiten in Droppsteenhöhlen (weet Se noch? StalagTiten hangt vun de Deck, as dat grote T, StalagMiten staht op'n Grund, as de Bagen vun de grote M.)

De Kristalle sünd mehrst dörchschienend, wenn se perfekt sünd. Wenn dor Kristallfehlers inbuut warrt orr bloots luter lütte Kristalle openanner sitt, warrt dat Materiaal undörchsichtig. Buten glänzt dat faken as Glas. Baven links sünd teemlich perfekte Kristalle, dat Bild ünnen wiest undörsichtige.

De kristalline Form vun den Calcit is mehrst ahn Farv, kann aver dörch Fremdatome un anner mechanisch Tosätze vele ünnerschiedlich Farven hebben, as to'n Bispill dat Geel-orange bi den "Sünnensteen vun't Leven", den Orangen-Calcit.

De Orangen-Calcit hett so'n schöne warme Farv un dorüm seggt man vun dissen Steen:

• He is de "Sünnensteen vun't Leven".
• Dat is angenehm, em in de Hand to hollen.
• He kann — jüst so as de Sünn — Energie geven, Kraft spennen,
• dat Hart warm maken,
• de Seel to Ruh bringen,
• för dat Oog en Freud sien
• un en Lächeln in dat Gesicht vun den tövern, de dissen Steen ankieken deit.
  

As Smucksteen is de Calcit nich good to bruken, he is to week un togliek to spröde. Aver to Dekoratschoon orr as "Handschmeichler" is he wunnerschöön.

To ehrn 14. Geburtsdag hebbt wi uns Enkeldeern ene grote Kugel ut Orangen-Calcit schenkt. Funnen harrn wi de in de "Dunkerschen Kate" in Bosau. Ik find disse Kugel so schöön, so warm, so angenehm in de Hand to hollen, dat ik se an'n leevsten behollen harr.