En Neophyt — dat drüsige oder indische Springkruut

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Warrt 2 m hooch: dat Springkruut

Toeerst weern de Goorners all begeistert vun dat drüsige Springkruut. Geev dat doch mal wat Nieges in de Goorns to sehn. De smuken farvigen Blöden in witt över rosa bit rod smücken de Goorns. De Planten kregen in korte Tied en Hööchde vun meist twee Meter. Se överragten de annern Bloom un överdeckten se. Allerdings bruukte de Plant veel Water un weer in de Hauptsaak an Flüsse un lütte Tümpel antodrapen.


Dat woor as Goornplant inföhrt — süht ja ok good ut!

Gau kreeg man mit, dat de annern Planten an de Wand drückt wöörn. Dat drüsige Springkruut, ok indisches Springkruut, is en Plant ut de Familie vun de Balsamine. Ok kreeg de Plant wegen ehr smuck Utsehn den Naam Bauernorchidee. Inföhrt harr man dat Springkruut as Goornplant, uursprünglich keem dat ut de Himalaya-Bargen — dorwegen ok de Naam "Indisches Springkruut". Aver na korte Tiet wull man se wedder los warrn. Un as dat so is bi uns "Zauberlehrlinge": Dat weer gor nich so eenfach. In de Auwälder vun den Bayrischen Woold nehm dat Springkruut al överhand.


De Blööt süht en Orchidee ok liek


Riepe Frücht

För Kinner is dat Springkruut en groot Vergnögen. Wenn se mit spitze Finger de riepen Schoten beröhrt, platzt de Schoot un schleudert ehre Samen bit to söven Meter in de Gegend. En Plant hett över dusend Samenkorns, bet hen to 4000 Stück. Dor kann man sik vörstellen, wi sik dat Springkruut bi uns breet maakt. Ik kenn düssen Mechanismus noch vun uns heimisch Springkruut, dat ok "Rühr mich nicht an" nöömt warrt. Wat harrn wi ümmer för'n Spaß!


De Samen vun't Springkruut seht lustig-lockig ut

De smucke sööt duftend Blööt lock vele Insekten an. De Hummeln kröpen in de Blööt un kemen mit Blödenstoff up den Kopp wedder to'n Vörschien. Mi erinner de Blödenform an den Iesenhoot. Dor hebbt wi ümmer "Peerd un Wagen" to seggt. Bi dat Springkruut weern an den Blödenstööl to glieke Tied Blöden, Knuppen un riepe Frücht. Blööhtiet is vun Juni bit Oktober.


Dat gifft de Plant ok in Dunkelrood

Vör en poor Daag weer ik bi mien Söhn. He wahnt in Lübeck dicht an de Wakenitz. Dor harr sik dat Springkruut ok dull breet maakt. Kuum dat wi över enen Steeg an't Water kemen. Dat weer de reinste Uurwoold. — An't Water steiht dat Kruut besünners geern, un in en dichten Bestand fallt op jeden Quadratmeter Borrn bet to 32000 Samen — so veel Samen steit dat Kruut ut. Klaar, dat dor nix anners mehr Foot faten kann. So schöön dat utsüht: en Springkruutfeld is eentlich en Monokultur, för anner Planten un Deerten en Wööst.

Man snackt regelrecht vun en Gefohr för de heimischen Planten.


An't Water finnst dat Springkruut


20.9.2015


na baven