So as dat dei kollen Dåch in’n Mai gifft, kann dat nå dei ollen Buern- un Wäderrägeln ok in’n Rosenmånd (Juni) besonners inne bargigen Rebeits von Düütschland un Österriek dei Schåpsküll twüschen den 4. un 20. Rosenmånd (Juni) as kolle Dåch gäben. Dei Wäderwiessegger näumen dat ok 'n „Singularität“, wenn ümmer wedder so üm dei glieke Tiet dat Wäder nich so is, as dat nå'n Kalenner sien süll. Un dor dat üm disse kolle Tiet in'n Rosenmånd dei Schåp an'n Pelz güng un dei nu af un an åhn ehr Winterkleid wägen dei „singuläre“ Küll besonners in't Alpenrebeit düchtig bibbern mössten, keemen uns Vöröllern up den Infall, disse kollen Dåch „Schåpsküll“ tau näumen. — Doch dörch den Klimawannel blifft disse Schåpsküll ümmer öfters bi uns ut un is nu in'n Schnitt blot alle drei Johr tau beläben.

Un äbenso as dei kollen Dåch in'n Maimånd mit dei Hilligen Ieskierls Pankratius, Servatius un Bonifazius in Verbinnung bröcht würn, so full dei 11. Rosenmånd as Fieerdach för den Hilligen Apostel Barnabas inne Schåpskülltiet.

In't Niege Testament gifft dat all Informatschonen tau Barnabas. Hei keem up Zypern up'e Welt, keem nå Jerusalem un wür ok 'n Apostel näben dei twölf Jesusadepten vonne Urchristen, hei hett sogor in Rom predigt un is üm 61 nå Christus wedder up Zypern vonne Welt gåhn. Hei wür in'n Klosteranlåch inne Neech von't hütig Famagusta (Stadt in'n türk'schen Deil von Zypern) tau sien letzt Rauh lecht. Låters wür hei hillig språken un as Hilliger vonne zyprisch Natschon ihren em noch ümmer wedder väle gottglöwig Minschen un besäuken sien Graff inne Krypta von't St. Barnabas-Kloster.

Ok Jesus warrt as "Lamm Gottes" in Schaapsgestalt wiest. Mäh!

Œwer Barnabas is nich blot 'n Hilliger, sonnern bi dei Kathool'schen ok dei Schutzhillige vonne Fassbinner un Wäwer. Un dor dat Fatt för den Wien von Bedüdung is, gifft dat ok olle Buern- orrer Wäderrägeln. Taun Bispill:

• Kümmt't Barnabas von båben Natt, schwemmen Druwen in dat Fatt.
• Rägen't tau St. Barnabas, denn rägent't 40 Dåch.
• Gifft't tau Barnabas väl Rägen, is dat för denn Wien 'n Sägen.
• An'n St. Barnabas möt dei Seis up'e Wisch.

"Wi moeten dat ganze Johr up dei Wisch — un up den Diek !"