Rosetta

Dei Rosetta-Mission: Instrumente an Bord van Rosetta


Sietdem Rosetta upwaoket is, lett dei Stür-Manschkup eine Riege van Testprozeduren affloopen. So will man möglicke Fählers in dei Software van dei Ruumsonde wegkriegen.

Rosetta flügg nich blots dör einen freien Weltruum, sünners disse Sonde is up dei Jagd nao einen frömden Ball ut Stoff un Ies, so groot as dei Barg Mont Blanc.


Komet-67P-CG vom 5. Oktober 2013, Bild: ESA

Et geiht nich blots üm den Komet. Man werd wat lern äöwer dat Entstaohn van dat Solarsystem un up wekke Ort sick dei Komet sietdem verännert hätt. Man kann dorut trüggeschluten up dat Entstaohn van Planeten un dei ehre Evolution. Dei Kometen wören all bi dat Entstaohn van dat Solarsystem dor. Dei wörden in einen deipen Frost jaoget un häbbet väle Informationen spiekert. Disse Mischkung ut Urmateriaol schall us wiesen, wo wi sülwes herkaomet.


Rosetta un Philae an'n Kometen (Montage). Klick up tau'n Vergröttern!

Dortau giff et an Bord van Rosetta ölf Instrumente:

  • Dat Ultraviolett-Spektrometer ALICE schall nao Edelgase seuken. Dei Mischkung van disse Gase giff Utkunft äöwer dei Temperatur vör 4,5 Milliarden Johre, dei Tied van dat Entstaohn. Blots dit Instrument van dei Rosetta-Sonde kummp ut dei USA.
  • Knipset werd mit dat Bildsystem OSIRIS (Optical, Spectroscopic and Infrared Remote Imaging System) mit twei Kameras: Dei Wietwinkelkamera mit ein 12°x12° un dei Telekamera mit ein 2,2°x2,2° anleggtet Sichtfeld. Beide Kameras häbbet eine Speegeloptik, ein Filterrad un einen 4-Megapixel-Sensor tau'n Utrichten un tau'n Knipsen, besünners van dei Deilkenwulke un dei Baobensiete van den Komet daol bit tau eine 2 cm Uplösung bi den minnsten Affstand van 1 km, in dei sichtboren un naohen Infrarot Spektraolandeile.


Bi dei Montage van Rosetta

  • VIRTIS (Visible and Infrared Thermal Imaging Spectrometer) schall middel bit minne uplöste Biller van den Komet scheiten, womit man dat Vörkaomen van dei funnen Elemente up dei Baobensiete van den Komet wiesen kann.
  • Dat Instrument MIRO (Microwave Spectrometer for the Rosetta Orbiter) schall nao extrem flink wegfleigen Elemente seuken un ehre Verdampraote mäten. Dormit will man Informationen äöwer dat Tausaomesetten van Karn un Koma (Gas-, Stoff-un Dampmantel), äöwer dei kometoren Aktivitäten un äöwer dei physikaolischke Eigenschup van dei Karnbaobensiete un äöwer Koma-Moleküle faoten.
  • ROSINA (Rosetta Orbiter Spectrometer for Ion and Neutral Analysis) bestaiht ut ein Magnet-DFMS un einen Fleigtied-Massenspektrometer RTOF, dei Ionen un Neutralgasdeilkes naowiesen käönt. Dordör finnt man tau'n Bispill dat Tausaomesetten van dei orig dünnen Kometatmosphäre un dat Wesslewarken tüschken dei Deilkes.


Dei Instrumente van Rosetta un wo sei sittet. Klick up tau'n Vergröttern!

  • Tau'n Ünnerseuken van den Kometenstoff werd COSIMA (Cometary Secondary Ion Mass Spectrometer) uck mit ein Massenspektrometer dat Upträen van Elemente, Isotope un Moleküle faoten.
  • Dat hochuplösen Rastersondenmikroskop MIDAS (Micro-Imaging Dust Analysis System) kann dei Fienstruktur van einkelne Stoffdeilkes in Bildform wiesen.
  • Dat RPC (Rosetta Plasma Consortium) dräg in sick Ionen- un Elektronendetektoren un ein Magnetometer. Dei mätet physikaolischke Eigenschkupen van Karn un Koma, un dat Wesselwarken tüschken Koma un Sünnenwind.
  • Dat CONSERT-Experiment (Comet Nucleus Sounding Experiment by Radio wave Transmission) ünnersöch dei Struktur van den Kometkarn.
  • GIADA (Grain Impact Analyser) ünnersöch dei Koma un bestimmt dei Taohl, Gröttde un Geschwinnigkeit van dei dorin schwäwen Stoffdeilkes.


Arbeitsmodell van Rosetta

Dat Kommunikationssystem RSI (Radio Science Investigation) bruket man tau'n Bestimmen van dat Komet-Gravitationsfeld, dei Gröttde, Masse, Form un Struktur van den Kometkarn.

Dei Wätenschkupdaoten werd up einen Solid-State-Spieker mit 25 GBit Kapazität affleggt.


Dei Äöversicht äöver dei Instrumenten up Ingelsch: hier.
Mit Infos van Wikipedia, dei freie Enzyklopädie; Südollnborger Platt: Ludgerd Lüske
Biller: ESA

9.2.2014


na baven