OSIRIS-REx is wedder dor!

van Ludgerd Lüske

Süh ok hier:
Osiris-Rex 1
Osiris-Rex 2
Osiris-Rex 3

Teleskop finnt trüggefleigen OSIRIS-REx-Sonde

Is dat ein Ruumschip? Ein Asteroid? Süh, man süht beide Deile. Disse lüttke, middige Placken is dat eierste Pixel-Bild van eine Weltruumsonde up den Weg nao Huus, dei eine Kapsel bi sick hätt mit Asteroid-Materiaol, dat Hunnerte van Millionen, vellicht uck Milliarden Johre old is. Disse Ruumsonde is OSIRIS-Rex van dei NASA, dat Materiaol kummp van den Asteroid Bennu.

Bildmidde: trüggekaomen Osiris-Rex-Sonde at Pixelpunkte. Bild-Daoten: ESA

Vandaoge, an'n 24. September, schall dei Mission ehr Steinmateriaol in Utah affsetten.

An'n 16. September fünnt dat ESA-Teleskop: Optical Ground Station (OGS) up Teneriffa dei OSIRIS-Rex-Sonde. Dei was 4,66 Millionen km van dei Ern weg. Dit Bild is eine Kombination ut 90 Einkelbiller mit eine Belechtungstied ümmer van 36 Sekunnen. Dei dö man unner Beachten van dei krumme Baohn van dei Ruumsonde tausaomesetten. So süht man dei Achtergrund-Sterne krumm un langtrocken.

Dat 1-Meter-OGS-Teleskop van dei ESA bawde man taun Faoten van den Weltruum-Schrott in den Erd-Ümloop.

För disse Upnaohmen van den Asteroid-Forschker äöwenöhm dat Near-Earth Object Coordination Centre (NEOCC) van dei ESA dat Leit. Meddewiel weitet wi, dat de Lannung lückt is. Mehr dortau bald!

Van use lüttke, aower fiene Weltruum-Sekerheit-Teleskop ut sägget wi:
"Moin, OSIRIS-Rex, väl Glück NASA un wiss willkaomen up dei Ern, Asteroid Bennu!"