Bittersöter Nachtschatten
Solanum dulcamara — Familie Nachtschattengewächse (Solanaceae)

vun Anke Nissen


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest

Vele Planten ut de Familie vun de Nachtschattengewächse höört to de Giftplanten. Sogoor Planten, de as Nutz-Planten anbuut warrt, köönt in ehre grönen Dele un in de noch unriepen Früchte de giftig Substanz Solanin in sik hebben. Dit Alkaloid reizt de Verdauungsorgane un kann Krämpfe utlösen.

To de Familie vun de Nachtschattengewächse (Solanaceae) höört uns Bittersöter Nachtschatten, man ok de Kartoffel, Tomate, Paprika, Aubergine — un de Tabak.

Der Bittersöte Nachtschatten is ene hoge klettern Struuch-Plant (bet to 2 m hoch) mit düsterviolett Blöden un Früchte, de an'n Anfangs gröön later root sünd.

Fröher hett man den Bittersöten Nachtschatten mit Wien mischt un denn as Slaapmittel bruukt.
De Germanen mischen den Bittersöten Nachtschatten mit Solanum nigrum, den Swatten Nachtschatten. Se bruken dit Gemisch as Narkosemittel un gegen den "Nachtschaden", dat weer sowat as Albdrööm bi Nacht.

Bittersöter Nachtschatten wörr fröher de Kinner in de Weeg leggt, as Schutz gegen böös Geistervolk. Man hett Bittersöten Nachtschatten ok dat Veeh üm 'n Hals hangt as Schutz gegen Engbrüstigkeit. In'n Mittelöller wörrn de Beern vun disse Plant üm 'n Hals dragen as Talisman orrer as Amulett gegen övel Nareed.

Alle beid Nachtschatten — de Bittersöte Nachtschatten un de Swatte Nachtschatten — weern Bestanddele vun Hexensalven, Hexentinkturen un Hexendrünk.

Dat weern nu ja all de Anwendungen vun'n Volksgloven. Dorvun is nich veel nawiest — wenn een den Nachtschatten gegen övel Nareed bruken will, mutt een woll sien Verleumder mit en Drank ut dat Tüüchs inslöpern, denn höllt he sien Muul. Avers dat gifft ok verbürgte Anwendungen: Bittersöter Nachtschatten kann oft wat helpen bi Probleme dörch Neurodermitis un ok bi anner Huutlieden, as Ekzeme.

Düsse Wirkung, liek as de Ideen vun'n Volksgloven, sünd al lang bekannt. Dorüm heff ik disse Plant — de ik hier aflicht heff — ok in enen Kloostergoorn funnen.


30.11.2018


na baven