Asteroidenkieker MASCOT is up Ryugu landet

van Ludgerd Lüske



As weer ein lüttke Kuffer afsmäten worrn: Künstlerbild van dei Landung van MASCOT up den erdnaohen Asteroid (162173) Ryugu (1999 JU3). Wokeen kennt nich den Oldie "Ich hab noch einen Koffer auf Ryugu"?
Bild-Daoten: DLR (Dütschke Zentrum för Luft- un Ruumfohrt)

Asteroiden sünd, liek as Kometen, intressante Tügen van dei ole Tied, as dat Sünnensystem noch jung weer. Se sünd dei nableven Brocken, dei dat dormalen nich taustanne bröcht hebbt, sik tau ein Planeten tau formen. Dorwegen warrt dei ok in uns Tied mit Vermaak erforschet. Dei Brocken sünd aver lütt; ehr Tall liggt bi ein Millioon orr mehr, un alltohoop weigt all disse Asteroiden tausamen minner as 1 Promille van dei Eerdmasse. (Dor weer kein anstännigen Planeten bi rutkamen, ok wenn se dat schafft harrn, sik tausamentaudoon!) Up so ein Deil tau lannen is also ein Kunststück.


Fleigbaohn van Hayabusa 2. Bild-Daoten: DLR, affännert

MASCOT (Mobile Asteroid Surface Scout) is ein Asteroidenlander un Rover. Dei wörd unner dat Leit van dat Dütschke Zentrum för Luft- un Ruumfohrt (DLR) tausaome mit dei französken Ruumfohrtagentur CNES un dei japaonsken Ruumfohrtbehörde JAXA bawed. Dei japaonske Sonde Hayabusa 2 startede an'n 3. Dezember 2014 nao den Asteroid (162173) Ryugu un harr dissen Lander mit an Bord. 2018 köm dat Sondenspann bi den Asteroid an. An'n 3. Oktober 2018 sprüng MASCOT van Hayabusa 2 aff un landete up Ryugu. Dorbi dreihde sick dei lüttke Lander automatischk in dei passen Mätlaoge. Nao Kommandos van dei Eern hüppkede dei Apparaot van eine Mätstäe nao dei annern.


MASCOT, dei dütschke Lander för dei Hayabusa-2-Mission. Bild-Daoten: DLR

Dei Mission

"Hayabusa" heit "Wanderfalk" up Japanischk — in Asien schnacket sei gern wat blaumiger. Dei Chinesen neumet ehr Ruumfohrtüge ja sogor "Morgendämmerung", "Götterschipp" orr "Himmelspalast". "Wanderfalk" is dor in'n Vergliek noch nüchtern!

Dei Ruumsonde Hayabusa 2 is an'n 27. Juli 2018 bi den anstüerten Asteroid ankaomen. Eiers wörd van wieden dei Asteroid naokäken un laöterhen schall disse Sonde dor landen un Steinwark upnähmen. Dit Materiaol schall dei Apparaot denn nao dei Eern trügge bringen. Bit tau drei annere Rovers un MASCOT helpet dat Mauderschipp bi dat Seuken nao eine passen Stäe för dei Probenaohme. MASCOT schall uck sülwes up Ryugu Experimente maoken.


Hayabusa 2 (dütschk: Wanderfalke 2) is eine Mission van dei japaonske Weltruumagentur JAXA nao den Asteroid (162173) Ryugu un trügge.
Bild-Daoten: Wikimedia, Autor Go Miyazaki

300 Millionen Kilometer van dei Eern weg sprüng MASCOT an'n 3. Oktober 2018 üm 3:58 Uhr ut eine Hööchte van 51 Meter up Ryugu tau. Bold 20 Minuten läöter (dat geiht langsaom wägen dei ringe Gravitation) hüppkede dei lüttke Sonde dor äöwer den Bodden un köm an't Staohn. Forts füng dei Apparaot an tau mäten. Dorbi hüppkede hei drei Maol van eine Stäe nao dei annere dör siene Schwungmasse, dei dei Lander van binnen andreew. Up jede Stäe löp sien Mätprogramm aff. Uck bi dat Hüppken löpen wisse Mätprogramme wieder. Aale upnaohmen Daoten güngen äöwer Hayabusa 2 wieder nao dei Eern. Üm 21:40 Uhr wörn dei Batterien los un dei Mission van MASCOT was daon.


MASCOT-Schwungarm (2014). Bild-Daoten: DLR

MASCOT is ein Landeapparaot in Quaderform mit dei Maote van 30 maol 30 maol 20 Zentimeter un dei heele Masse von rund teihn Kilogramm. Dei geniale Schwungarm van MASCOT deinet dortau, den Kassen van dei Stää tau bewägen — ganz sünner Rööd, einfack dör Kippen. Wenn dei Arm uthaolt un schwinget, kippet dei Kassen in dei gewünschte Richt.


MASCOT-Schwungarm (greun). Bild-Daoten: DLR

Dei Technik

  • Raohmen: Dei Raohmen van den knapp 10 kg schworen Lander is mit blots 450 Gramm orig licht un dorbi heller stief. Dit krigg man hen mit 0,125 mm dicke CFK-Laogen, dei man mit einen Schuumkarn as ein Laminat tau ein Fachwark tausaomesettet. Dei nauen Butenmaote sünd 27,5 x 29 x 19,5 cm.
  • Bewägung: Dei Gravitation up Ryugu is so minne, dat ein Bewägen up Räöe nich gaiht. So werd ein Impuls äöwer eine exzentrischk laogerte Schwungmasse gäben, dei binnen van den Lander andräben un affbremset werd. Dör ein wisset Anstüern van dissen Aktuator kann man dat Uprichten van verschiedene Sieten un dat Springen bewarken.
  • Utrichtung fasteleggen, Navigations- un Kontrollsystem (GNC): Fief optischke Sensoren un seß Fotozellen läwert dei Daoten, womit man dat Utrichten van den Lander faste leggen kann.
  • Kommunikation: Twei Patchantennen mit Rundstraohl-Eigenschkup bewarket dei Kommunikation mit Hayabusa 2, dei disse Daoten an dei Boddenstation up dei Eern wiederleitet.
  • Temperaturkontrolle: Up den Henflug bruuket MASCOT eine Heizung. Dormit werd dei Elektronik un dei Batterie warmt. Nao dat Landen up Ryugu fallt binnen so väl Warmte an, dat ein Thermalsystem disse affleiten mutt. So krigg dei Elektronik kiene Äöwerhitte. Dei Elektronik is dör Leitungen mit einen Keuhler an dei Bäöwersiete verbunnen. Dei Batterie werd äöwer veier Metallstangen mit einen tweiden Keuhler verbunnen.
  • MESS: Dat Elektromechaonischke Versorgungssystem is dei Äöwergangsstäe tüschken MASCOT un Hayabusa 2. Tau den mechaonischken Raohmen, dei Stromversorgung un dei Daotenverwaltung giff et noch den Mechanismus, dei MASCOT up den Asteroid affschmitt.


Tausaomebawen van MASCOT an dat DLR (2012). Bild-Daoten: DLR

Dei Instrumente

MASCOT hätt Platz för veier Instrumente (Nutzlasten), dei tausaome drei Kilogramm schwor sünd. Disse hoge Nutzlastandeil is eine Besünnerheit van dissen Apparaot.

  • MicrOmega: Mikroskop för dat naohe Infrarot tau'n Faoten van dei Materiaol-Eigenschup in dei direkte Ümgäwung, bawet van CNES
  • CAM: Kamera, bawet van dat DLR
  • MARA: Radiometer tau'n Bestimmen van dei Boddentemperatur, dei Straohlungskraft un dei Warmte-Spiekertaohl van dei Ümgäwung, bawet van dat DLR
  • MasMAG: Fluxgate-Magnetometer tau'n Mäten van dat Magnetfeld, bawet van dat Institut för Geophysik un Extraterrestrischke Physik un dei Technischke Universität Braunschweig (TUBS).


Schadden van MASCOT bi dat Landen up Ryugu. Bild-Daoten: DLR, affännert


Originaol-Artikel: süh hier
Hayabusa 2: süh hier
SO-Platt: Ludgerd Lüske


13.10.2018


na baven