Luftakrobaten 2019

In de verleden Johrn sünd uns flegen Insekten gewaltig trüchgahn. Al siet 'n Tied maakt de oostfreesche Hobbyfotograf Thomas Seemann Insektenfotos för Fotokalenner, de sien Team "Tandem"/OBW rutgifft. Verleden Johr hebbt wi mit düsse Fotos en Kalenner uns Bottervagels toegnet. Düt Johr schall dat üm annere Luftakrobaten in Pagels' Goorn gahn.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Juni-Akrobatin:
Mist-Imm op Holunner

vun Thomas Seemann un Marlou Lessing


De Juni grööt uns mit en warmen Dag, un wi hööpt, dat wi den Holunner bald in Blööt sehn dröfft. De Hollerbusch, Fru Holle ehr Boom, is wunnerdedig in mennig Wies, en Welt vun Sagen un Legennen ümgifft em, jedeen vun uns kennt un leevt em un hett Erinnern an em vun Kinnertied an. De blagen Beeren in'n Harvst warrt to Marmelaad un Supp kaakt — un eerst sien Duft! De kümmt to uns as ut en anner Welt — en töverhaftig Optakt för den Sommer.

Gor nich an Duft erinnert de Naam vun uns Akrobatin vun düssen Maand: Se is en Mist-Imm. Nanu? Immen sünd doch wählerisch un gaht nich op Mist?! Ja: De Mist-Imm is ok gor keen Imm, se is en Sweevfleeg!

Vun de Sweevflegen schall dat ca. 6000 Aarten geven, de överall op de Noordhalvkugel leevt; üm un bi 450 kaamt in Düütschland vör. Se sünd faken unschienbor, faken richt se sik in ehr Utsehn na de wehrhaftigern Insekten — en Kleed in Geel un Swatt heet: Gripp mi nich an, ik kann di wehdoon! Ok Hellbruun-Swatt, as bi de Mist-Imm, wirkt noch as Wohrschuug. Düssen Trick bruukt heel vele Sweevflegen, schoonst se eentlich ganz harmlos sünd: se köönt weder steken noch bieten.

Avers düsse Familie vun Flegenverwandte is sünst keen Trittbrettfohrer. Se freet bloots Pollen un Nektar un sünd dorwegen tosamen mit de echten Immen (Wild- un Honnigimmen) uns wichtigste Blöden-Bestövers. In ehr Floogkünst sünd se eenzigaardig: Se köönt wohraftig luud- un reglos op een Steed in de Luft stahn, regloser noch as Libellen! Se sweevt bookstäävlich. Sogor bi Wind! Un allens dat mit bloots twee Flögels, as Flegen.

Un woso "Mist-Imm"?

Tjahaa! Dat sünd de opwussen Sweevflegen. Ganz anners avers süht dat mit ehr Larven ut. (Dat is as "Dr. Jekyll un Mr. Hyde", bloots dat de Verwandlung boots eenmal passeert.) De Larven sünd allens annere as reinlich-tamme Veganers. Mennig Sweevflegenlarven freet annere Insekten — in ungeheuer Mengen, wieldat Larven wassen mööt —, t.B. Blattlüüs un anner Schädlinge. Un ok sünst sünd se keen beten etepetete: De Larven wasst deelwies in Schiethupen, Mudd orr Jauchekuhlen ran. Letzteres bi de Mist-Immen. Un vun dor hebbt se ehrn Naam!

Wat mehrst to'n Wunnerwarken is: Düt lütte Insekt treckt in'n Harvst as de Wannervagels an't Middelmeer un in't Fröhjohr torüch! Över de Alpen! Heel plietsch nütt dat dorbi Windströmungen un Pässe ut, bit in 2000 m Hööcht! Dat maakt mi jümmers ganz bescheiden. Jungedi, düsse Deerten hebbt doch gor keen richtigen Bregen, bloots en wat dickern Nervenknütten — wat köönt de allens dormit doon un behollen! Nee, se denkt nich richtig, hannelt ut Instinkt un hebbt keen Bewusstween; avers all düsse Fähigkeiten — ehr Floogkunst un Körperbeherrschung, ehr typisch Verhollen in'n Verloop vun ehr Leven, Partnersöök, Paarung un Eiaflaag, de Künn vun Nohrn, Planten un Fiende, dat Weten, dat, wannehr un woans een sik op den Weg över de Alpen maakt; de Künn, de Himmelsricht to lesen, de Alpenpässe to finnen un den Wind to rieden — allens dat mutt in düt verlängerte Rückenmark spiekert ween!! Manninnetünn: Wenn düsse Deerten en Bregen vun de Grött as wi harrn — wat kunnen se denn sachs dormit maken?

Na klaar: En Bewusstween entwickeln, Ingenieursfähigkeiten entwickeln, Füür, Rad, Bookdruck un Internet erfinnen, Bomben buun un de Natuur terstören.

Oder?

lütt sweven
fleeg
allens is
in de sweev
in en versehrbor
liekgewicht

versehrbor?
du
steihst in de luft ok bi stormbö:
so lütt, so licht
so kumpabel

un wi all sweevt
in fru holle ehr hand


2.6.2019


na baven