Dat Kruut för'n Maimaand:
Scharbockskruut

vun Anke Nissen

Ranunculus ficaria — Familie Hahnenfußgewächse

Anner Namen:

 

Scharbock, Scharbockskraut, Schinnwurz, Schmergel, Schmirgel, Schmirkenblume, Klein-Schellkraut; Feigwurz, Feigenwarzenkraut, Feigblatterneppich, Biberhödlin, Pfaffenhödlin, Rammelhödlin, Erdgerste, Himmelmehl, Mäusebrot, Glitzerli, Gesselblomen, Gesselblumnen, Goldblümli, Sonnenblümli, Spiegelblume, Sternblümlein, Hänkelesalat, Butterblätter, Maiblätter, Maienkraut, Bettlerkraut, Jägerkraut

Sammelt warrt:
Bläder
So warrt't anwennt:
De Bläder warrt in't Fröhjohr as Salat eten.
De Blödenknospen kann man as Kapern inleggen.
Wohrschu: De Knöllchen vun de Wörteln köönt up de Huut Blasen trecken.

 


 

 

Scharbockskruut höört mit to de eersten Blöher in't Fröhjohr. Sien Blööd is en güllen glänzen Steern, — smuck antokieken.

Dat warrt seggt, dat dit lütt Kruut Warzen wegdrieven kann..

Vör Johren heff ik mal enen Adventskalenner maakt, dor müss elkeen Dag ene Plant raadt warrn. Achter de Döör vun'n 21. Dezember sä ene Plant vun sik:

Ik blöh al in'n März.
Mien oll Naam bedüüdt "Skorbut".
Un dorgegen weer ik fröher in de vitamin-arme Tiet en Hülp.

All hebbt dat richtig raadt: "Scharbockskruut" harr sik achter de Adventskalennerdöör versteken.

Wieldat dit lütt Kruut al fröh in't Johr dor is, hett man de Bläder geern mank Salat mengeleert. Dat sull goot wesen gegen Skorbut.
De Naam Scharbockskruut sall vun de slimme Mangelkrankheit Skorbut kamen. Seelüüd — man ok Lüüd an'n Land — leden fröher oft ünner Vitamin-Mangel, ehre Tähn wörrn wackeln, füllen oft rut. Dor hebbt se denn de Bläder vun't Scharbockskruut in't Fröhjohr funnen un eten. In dit Kruut stickt würklich veel Vitamin C in.
Dorüm sünd de Bläder goot för ene Fröhjohrs-Kur un ok för Salat.

Wenn aver de bodderblanken gelen Blödensteerns upblöht, denn sall een de Bläder nich mehr eten.

Geihst du in't Fröhjohr an enen Sünnenschien-Dag in't Gröne, denn sühst du bestimmt enerwegens dat güllen-gele Scharbockskruut lüchen.

"Elkeen Morgen — wenn de Sünn schient — so twischen acht un negen Uhr gahn de Blöden up. Dor kunnst meist de Klock na stellen. Un so gegen 14°° gahn se wedder to. De Blomen hebbt ehre Upstah-Tiet un ehre Slaaptiet. Dat hett de Natur so inricht." — so orrer so ähnlich hett Gertrud Everding mal schreven.

Wenn dat regent, denn maakt de Blomen ehre schönen Blödenbläder gor nich eerst up.

Antje Hesslers lütt Tante Anna sä över Scharbockskruut:
"De doren Gesselblomen maakt mi den helen Rasen twei."

In mienen Goorn — nerrn in'n Knick — maakt se sik ok bannig breet. Dor is denn in't Fröhjohr so'n richtig güllengelen Teppich.



na baven