Dat Kruut för'n Saatmaand:

Bärendruuv

vun Anke Nissen

Arctostaphylos uva ursi orrer Arbutus uva ursi — Familie Ericaceae (Heidekrautgewächse)

 

 

Anner Namen:

Bärbenerstaude, Bärentee, Bärentraube, Bewell, Garben, Granten, Harnkraut, Mehlbeere, Mehlgranten, Moorbeere, Moosbeere, Rausch, Rauschgranten, Sandbeere, Steinbeere, Totenmyrte (Schlesien), Wilder Buchs, Wolfsbeere

Plattdeutsch: Bärenbeer, Bärendruuv, Mehlbeer, Moosbeer, Sandbeer, Steenbeer

Englisch: bearberry

Sammelt warrt:

Folia Uva ursi, Bläder vun junge Planten, vun'n April bet Juni.

Warrt bruukt:

gegen bakterielle Harnwegsinfektion

So warrt't anwennt:

  • 1 Eetlöpel dröögt (lütt sneden) Bläder mit 1/5 l kolt Water övergeten.
  • 12-14 Stunnen stahn laten, afseihen un denn tominnst 10 Min. kaken.
  • Avends warm drinken (mit'n Messerspitz Natron nehmen!)
  • Nich up Duur nehmen!

De Bärendruuv is en lütt, över de Eerd krupen, dal-liggen, jümmers gröön Plant.
Ehr Bläder seht ut, as de vun de Preißelbeer, se hebbt aver kene Pünkten, keen Tüpfel, se sünd an de Ünnersiet as'n Netz mit Adern dörchtrocken.
Ok de Blööd (Form as en Krug) süht ut as de vun de Preißelbeer (Form as en Glock), se is witt bet bleek-rosa. Se blöht in in'n Mai un Juni.
De Früchte (Steenfrücht) sünd root un staht in lütte Druven, se sünd in'n August riep.

Vörkamen deit de Plant in nordisch Landen, in Norddüütschland bet hen na de Weser. Se wasst geern up dröög Sandbodden in'n Wald, up de Heid. In West- un Süüddüütschland findt wi de Bärendruuv selten, meist blots in de Bargen up steenig Avhänge.

Preißelbeer-BlattBärendruuv-BlattDe Bärendruuv is licht to verwesseln mit de Preißelbeer, de beiden sünd aver goot to ünnerscheiden:

  1. De Blöden: Preißelbeerblöden seht ut, as lütte Glocken, se sünd 4-zählig. Bärendruvenblöden seht ut, as en lütten Krug, se sünd 5-zählig.
  2. De Bläder: Preißelbeerbläder (Blid linkerhand) sünd an'n Rand so'n beten inrullt un licht kervt, vun ünnen seht se ut, as harrn se hier un dor Pünkt.
    De Bärendruvenbläder (Bild rechterhand) hebbt enen flachen Rand, sünd nie nich inkervt, un vun ünnen sünd se — as'n Netz — mit Adern dörchtrocken.

 

Dat warrt seggt, dat Bären de roden Beeren vun de Bärendruuv geern freet, dorher sall de Plant den Namen kregen hebben.
Dat warrt ok seggt, de Plant hett dorüm den Namen "Bärendruuv" kregen, wiel se dor wasst, wo de Bären leevt.
Up jeden Fall is de Naam "Bärendruuv" en Översetten vun sienen wissenschaftlich Namen:
árktos staphylé = griechisch: arctos = Bär, staphyle = Druuv. ursus uva = latiensch: ursus = Bär, uva = Druuv.

De Naam "Totenmyrte" för uns' Bärendruuv wiest dor up hen, dat dit Kruut — dit jümmer gröön Kruut — ähnlich bruukt worrn is, as ik dat al bi Rosmarin beschreven heff: Dat Kruut sull helpen gegen böös Geistervolk:

  • En Twieg vun de Bärendruuv wörr in de Weeg leggt, dat dat lütt Kind enen Schutz harr vör allen Töver, vör't Verhexen.
  • Man hett glöövt, dat Kind kunn nich to'n Kröpel warrn, dat Kind kunn ok nich blöd orrer doof (doof bedüüdt "taub") warrn, un Hexen kunnen nix gegen dit Kind utrichten.
  • Man geev de Bruut enen Telgen Bärendruuv, dat se vör all Anfechtung enen Schutz harr.
  • Un man streu Bärendruven in de Stuuv, in de en Minsch doodkrank leeg, dat he dat lichter harr bi't Starven, un dat sien Seel up den Weg na de anner Siet nich vun'n Düvel orrer Hexen aflenkt wörr.

Man kann also seggen, de Bärendruuv hett den Minschen in de nordisch Länder dörch sien ganz Leven bistahn.

De nordisch Völker hebbt Bärendruven all jümmers as Heilkruut bruukt.
In en oll Krüderbook ut Wales — "Meddygon Myddway" ut dat 12. Johrhunnert — warrt al vun uns Bärendruuv schreven.
Richtig bekannt worrn as Heilkruut is de Plant aver eerst in't 18. Johrhunnert.

In mien Kinnertiet wörr in uns Familie "Bärentraubenblättertee" jümmers anwendt, wenn dat Blasen- orrer Nieren-Besweer geev. Bärendruvenbleder wirkt keimhemmend up de Harnweeg. Na mien Erinnern faarvt de Harn sik na dat Drinken vun dissen Tee gröön.
As ganz lütt Kind sall ik bannig stolt west sien, as ik endlich seggen kunn: "Bärentraubenblättertee" — so is mi vertellt worrn.

Fröher weer de Bärendruvenblädertee ok wohl en lichtes Mittel, üm de Wehen in'n Gang to bringen.

De Plant hett veel Gerbstoff in sik. Dorüm wörr se fröher ok to'n Gerben vun Ledder bruukt un ok to'n Farven vun Wull.

Hüüt warrt Bärendruvenblädertee bruukt, wenn't katarrhlich Besweer in' t Nierenbecken, in'n Harnleiter, in de Blaas orrer in de Harnröhr gifft.

 

Bärentraubenblättertee

  • 1 - 2 Teelöpel Bärendruvenbläder
  • mit ¼ Liter Water kolt övergeten,
  • 12 - 14 Stunnen trecken laten — af un to ümrögen,
  • afseihen.
  • Elkeen Dag 1 - 2 Tassen dorvun drinken.
  • Dorto jümmers 1 Tass Water drinken to'n Dörchspölen.

Teemischung gegen chronisch Blasenbesweer

  • 1 Eetlöpel vun disse Mischung
  • mit 1 Tass kolt Water övergeten
  • 6 - 8 Stunnen trecken laten
  • kort warm maken
  • afseihen
  • Twee Weken lang elkeen dag 2 Tassen dorvun drinken.
  • Un jümmers en Glas Water achteran!

Wichtig: Blasen- un Nierenlieden sünd Krankheiten, de jümmers en Ünnersöken vun enen Arzt bruukt!



na baven