Dör naakte Telgen Sneewind bruust.
De Külle kruppt dör Feld un Holt.
De Minschen gaht nu nich vör't Huus,
un uk de Deerten is't to kolt.
In't warme Nest baben in'n Boom
holt de Katteker Winterslaap.
He dröömt von lecker Nööt een Droom
un waakt ja woll noch lang nich op.
Man suutje ward de Winter mööd,
de Knubben sünd al dick un drall,
de eerste lütte Vagel fleut't,
dat Fröhjohr nu woll kamen schall.
De Sünn pliert dör een Wulkenlock,
kiddelt Katteker in de Nees.
Dor waakt he op, kriggt't bannig drock.
De Winterslaap, de is nu west.
Süh dor, hest sehn, de rode Blitz
suust in den Boom von baben daal
un hoppelt as so'n Zisewitt
dör Gras un Loof, as weer he mall.
Wat hett he doch för'n dullen Smacht!
Söcht ünner Böök un Eken.
Wor hett he blots verleden Harvst
de lecker Nööt versteken?
