Sünd Se en Kastangel?

vun Katja Renfert un Marlou Lessing


All Fotos: Katja Renfert. Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Sünd Se en Kastangel? Wenn Se twüschen den 15. un 24. Mai boren sünd (orr twüschen den 12. un 21. November), denn sünd Se een. Denn in'n Maimaand is de Tied vun de Kastangelblööt, un dor sett dat keltische Boomhoroskop — orr de "keltische Boomkrink" — de Kastangelminschen hen. So en keltische Boomkrink woor jüngst in den Loki-Schmidt-Goorn in Hamborg anplant. Siet Mai kannst em dor besöken; dat geiht noch bet Oktober. Hier steiht allens Wichtige.

Rund üm en Verklaarnstafel staht de Bööm — noch ganz jung un spiddelig — richtig in en Krink.


De Verklaarnstafel in de Midd


De junge Kastangel in den Horoskopkrink

Wat is dat denn, dat keltische Boomhoroskop? Nu, dat slütt en ganzen Johrskrink in Bööm in. De mehrsten Bööm — avers nich jedeen Boom — kaamt dorbi mit twee Tiedspannen in't Johr vör; dat is also anners as bi dat Steernteken-Horoskop. Avers veer Bööm — Eekboom, Olivenboom, Barkenboom un Böök — hebbt bloots jeweils een eenzigen Dag! Dat is also en grote Tofall, wenn een as "Barkenboom" boren warrt. Heel afsünnerlich!

Angeevlich hebbt düt Boom-Horoskop al de olen Kelten brukt, avers Wikipedia seggt, de Idee stammt ut de Nutied. Dat mag ween, as dat will, man dat is — as bi all Horoskope — ja en vergnööglich Speel, de Egenschapen, de de Bööm weddergeevt, in uns egen Persönlichkeit to söken.

De Kastangel gellt in düt Horoskop as besünners oprichtig, se heet "de Redliche". In de Beschrieven heet dat:

"De Kastangel is en basige Helper för de Gemeenschap, se sett sik mit ganze Knööv för ehr Ideaaln in, sünnerlich wenn de de Gemeenschap nütten doot. För ehr Familie deit se allens un weet sik jümmers to helpen." Na, hebbt Se sik al erkannt?

De Kastangel is as Boom ja nich wirklich en Familienminsch, avers se wirkt gesellig dörch ehr Blatt, dat utsüht as en Sellschap vun Bläder, un ok ehr Blöden sitt in Massen in schöne Rispen tohoop, de "Kastangelkerzen". De Kastangelboom is aver keen Wooldboom, sünnern steiht geern alleen op wiedes Flach, as "Solitärboom". Hier hebbt sik de Horoskop-Dichters villicht mehr an den Minschen as an den Boom orientiert.


De Beschrieven för de Kastangel

Wieder schrifft dat Horoskop: "Wat ut Kastangeln (also de Minschen) warrt, hangt dull vun de Levensümstänn af. Se köönt groot Karriere maken, avers dat kann ok ween, dat se ehr Leven lang vergeevs gegen Wedderstänn angaht un to nix kaamt. Se blievt sik avers tru; un düsse Gradlinigkeit maakt dat mennigmaal wat vigeliensch, mit ehr tosamentoleven."


De lütte blage Wagen is de Stempel vun Katja-Renfert-Fotos

Dat stimmt ja nu heel un deel, un noch dorto för all Bööm un Planten. Ehr Levensümstänn bestimmt allens — besünners to Anfang. För de Kastangel gellt dat wirklich besünners. De Kastangelfrucht is ja en dicke Boller, de flüggt nich wied weg as de Lindensamen, se warrt ok nich vun de Deerten wied weg sleept — dat will se gor nich, se hett ja en Stickelpanzer dorgegen. Dat lett schon teemlich dickköppsch. Woneem de lütte Kastangel also henfallt, dor mutt he keimen, un wenn dat 'n lege Steed is, denn warrt dor nix vun. Se warrt dat avers — as all Planten — bet to ehr letzten Kräfft versöken: Wöttel to slaan, to wassen un to diegen. — Mennigmaal sünd Planten un Minschen sik doch dull ähnlich.

Opletzt schrifft dat Horoskop: "In de Leevde streevt de Kastangel na Harmonie un deep Geföhl. Hett se eerstmal den rechten Partner funnen, denn is se tru un deit allens för ehr Familie." Na, hier is eendüdig de Dichtung togang, denn Bööm sünd ja alltohoop promiskuitiv un maakt — in ehr Blöhtied — öffentlich Sex mit allens, wat nich bi dree op de Bööm is. Sotoseggen. Man en Horoskop mutt ja en Horoskop blieven, un dor mutt ok wat to de Leevde seggt warrn.

Wat wi seker weet, is: Wokeen eenmaal den schönen Kastangelboom leven lehrt hett, de blifft em tru, denn düsse Boom is eenfach en Pracht.


En grote ole Kastangel, rood blöhend, in vulle Blööt. Rode Kastangeln sünd ror.


29.5.2016


na baven