Dei Speegel van Draokenooge mutt alltied kold wän

van Ludgerd Lüske



Dei fardige Hauptspeegel. Bild-Daoten: NASA

Bi den Bedriew van Draokenooge mäötet dei Speegels alltied orig kold wän. Wenn man dei eiersten Sterne un Melkstraotens (Galaxien) in dat freuhe Universum seihn will, mäötet dei Astronomen ehr affstraohltet Infrarot-Lecht (IR~) faoten. Dortau mutt man ein Teleskop-Instrument-System insetten, dat för dit IR-Lecht optimeiert is. Warme Objekte gäwt Infrarotlecht off Warmte aff. Wenn dei Speegel van Draokenoge deisüftige Temperatur har as dei van dat Hubble-Weltruum-Teleskop, güng dat schwacke Infrarotlecht van wiet wegliggen Melkstraotens in dei Infrarotstraohlung van dei Speegels unner. So mutt Draokenoge orig kold ("kryogen") wän. Dei Speegel-Temperatur ligg bi dei -220°C. Dei heile Speegelanlaoge mutt dorbi dei recht deipen Temperaturen uthollen un ehre Form stabil hollen.

Dormit Draokenoge staodig so kold bliff, bring man et in den Weltruum, wiet weg van dei Ern. Sünnenblenden wohrt mit ehren Schadden dei Speegels un dei Instrumente vör dei Sünnenhitte un scheermt dei aff van dat "warme" Ruumfohrtüg.


Draokenooge-Hauptspeegel nao den Kölde-Test (Kryogentest). Bild-Daoten: NASA

Ingenieure häbbt dat Utrichten in eine kryogene Vauumkaomer in dat Johnson Ruum-Zentrum van dei NASA testet. Dit Wark duurde bold 100 Daoge. Dei Binnenruum van dei Kaomer simuleiert den kolden Weltruum, wor Draokenooge warken schall. Dor kann DO Daoten ut vörher noch nich faote Weltruumdeile upnähmen. In dei Küldekaomer geewen dei Ingenieure Laserlecht dör dat Teleskop un simuleierden so künstlicke Sterne. Dei Test wiesde, dat dat heile Teleskop, mit dei Optik un dei Instrumente, in disse Külde pass funktioneierde. So kunnden sei wiss dormit räken, dat dat Teleskop uck in den Weltruum nau warken dö.


Dei Speegel mutt alltied kold blieben! Bild-Daoten: Lüske


Hier giff et mehr: The Story of Webb | Flickr
Originaol-Artikel: Web-NASA
SO-Platt: Ludgerd Lüske

14.7.2022


na baven