Wor is Jimmy?
Dat Teleskop James Webb is in den L2 Ümloop un keuhlt

van Ludgerd Lüske



Teleskopdeil van Jimmy äöwer dat Sünnensägel. Bilddaoten: NASA. Klick up tau'n Vergröttern!


Dei Reise van dat Teleskop James ("Jimmy") Webb is up'n End. Jimmy is nu in den Ümloop van L2. Dei Affkeuhltied löpp, vellicht werd dei Apparaot nu anstellt. So käönt Testen un Kalibreiern affloopen. Dornao fang Jimmy an mit dat Utrichten un Kalibreiern van den Teleskop-Speegel, wenn dortau dei Temperatur in dei plaonte Temperaturzone daolgaohn is un dei Instrumente anstellt wörden.


Teleskop Jimmy-Sünne-Ern-Lagrange-System. Bilddaoten: L. Lüske nao ein NASA-Bild.
Klick up tau'n Vergröttern!

Dat Teleskop un dei Wätenschkup-Instrumente keuhlden nao den Äöwergang in den Sünnensägel-Schadden gawe aff. Et werd aower ein poor Wäken duurn, bit dei Deile kold naug sünd. Disse Affkeuhltied werd nau mit günstig ansettde elektrischke Heizliesten faotet. In dei äöwerblieben fief Maonde för dat In-Bedriew-Nähmen werd dei Optik utrichtet un dei Wätenschkup-Instrumente kalibreiert.

Dei Sünnenümloop

Jimmy werd nich üm dei Ern loopen, so at dat Hubble-Weltruum-Teleskop, Jimmy werd üm dei Sünne loopen, dorbi flügg dit Teleskop 1,5 Millionen Kilometer van dei Ern weg, an den tweiden Sünne-Ern-Lagrange-Punkt L2.
Besünners an dissen Ümloop is, dat Jimmy up einen Streek mit dei Ern bliff, wobi dat Teleskop üm dei Sünne löpp. So kann dat groote Sünnensägel dei Jimmy-Instrumente vör dat Lecht un dei Hitte van Sünne, Ern un Maond wohrn.


Jimmy an den Lagrange-Punkt L2. Bilddaoten:L. Lüske nao NASA. Klick up tau'n Vergröttern!

Wat för eine Rulle spält hier dei Richtung van dei Ern un dei Sünne?
Jimmy nimmp meist in dat Infrarot-Spektrum up, ein Deil dorvan markt man uck as Warmte.
Wiel dat Teleskop dei orig schwacken Infrarot-Signaole van wiet weg liggen Objekte faoten schall, mutt man et van aale lechten un heiten Straohlers affschermen. Dortau hört uck dei Satellit sülwes! Dei Sünnenscherm trennt dei empfindlicken Speegels nich blots van Sünne, Ern un Maond, sünners uck van den Ruumfohrtüg-Technik-Kassen.

Dei Temperatur-Unnerscheid tüschken dei heiten un dei kolden Siete van dat Teleskop is orig groot — up dei heite Siete kunn man bold Waoter kaoken laoten un up dei kolde Siete Stickstoff (schmeltet bi -210,1 °C ) infreisen.
Jimmy sülwes warkt so bi minus 225° Celsius.
Wenn dei Sünnenscherm best warken schall, mäötet Sünne, Ern/Maond un Teleskop in eine Riege liggen.


Heite un kolde Siete an dat Teleskop. Bilddaoten: NASA. Klick up tau'n Vergröttern!

Jimmy bi L2

Wenn Jimmy dei Sünne, wieder weg van dei Ern, ümloopen dait, möß et denn nich mehr at ein Johr duuern för einen Ümloop? Ansick jao, aower dat Gliekgewicht van dei kombineierten Gravitation van Sünne un Ern an den L2-Punkt lätt Jimmy mit dei Ern bi den Sünnenümloop mithollen. Disse kombineierte Gravitation kann bi L2 bold ein Ruumschip faste hollen. So bruukt man minne Raketenschub för dat Stabilhollen van einen Ruumschip-Ümloop üm L2.

Jimmy werd up eine Baohn üm L2 loopen un nich nau bi L2 stationär sitten. Dei Baohn hätt bold dei Maote van den Maondümloop üm dei Ern. Bi dissen Ümloop, dei bold ein halwet Johr duuert, bliff dat Teleskop buutensiet van den Erd-Maondschadden. So hätt Jimmy alltied eine freie Sicht för dei Wätenschup-Operationen — süh Video.

Verkloren

Naohet Infrarot (englisch: near infrared, NIR) is kortwellige IR-Straohlung, dei sick direkt an den sichtboren (roen) Deil anschluttt van 780 nm bit 1400 nm.

Kortwelliget Infrarot (englisch: short wavelength, SWIR) 1,4 bit 3,0 µm

Middel Infrarot (englisch: mid wavelength, MWIR) mit Wellenlängten van 3,0 µm bit 8 µm.

Langwelliget Infrarot (englisch: long-wavelength, LWIR) 8 bit 15 µm

Fernet Infrarot (englisch: far infrared, FIR) is eine langwellige IR-Straohlung van 15 µm bis 1 mm und gaiht in den Deil van dei Terahertzstraohlung.



Originaol-Artikel: Umlaufbahn — Webb/NASA
SO-Platt: Ludgerd Lüske


7.2.2022


na baven