Draoken-Ooge hätt urolle Straohlung funnen, dei et nich gäben schull

van Ludgerd Lüske

Mit dat Draoken-Ooge-Teleskop (JWST) fünnt man wunnerliccke Straohl-Stäen in dat freuhe Universum. Wat sitt dor achter? Verklort urolle Schwarte Löcker neie Daoten, dei van dat Draoken-Ooge-Teleskop kaomt?

Bild-Daoten: Ludgerd Lüske, nao: Victor de Schwanberg / Getty Images / Science Photo Library (Utschnäen)

Dat Draoken-Ooge-Weltruum-Teleskop hätt schiens Lecht-Stäen funnen, dei ut eine orig freuhe Tied van dat Universum kaomen kunnen. Schulln disse Daoten wohr wän, kiekt dei Forschkers so in eine Tied trügge, in dei dat Weltall "eiers" üm dei 100 bit 200 Millionen Johre old was. Dat was woll eine Saoke van Belang, wiel man bit nu hen glöwde, dat et don minne off kiene Sterne un Galaxien geef.

Draoken-Ooge (JWST), Graofik-Bild. Bild-Daoten: Wikimedia

Wichtig hierbi is dat Rot-Verschuuwen: Dör dat uteinanner driewen Universum werd dei Straohlung van wiet weg liggen Lecht-Stäen in längere Wellenlengten uteinanner trocken un gaiht nao rot. Wenn dei Wert dortau grötter is, ligg dat Deil, wat man süht, in dei Tied wieder trügge. Vör dei Forschkung mit dat Draoken-Ooge-Teleskop (JWST) leeg dat üppste, wohre Rot-Verschuuwen van eine Galaxie in eine Tied, at dat Universum 500 bit 600 Millionen Johre old was.

Rot- und Blaw-Verschuuwen. Bild-Daoten: Ludgerd Lüske

Mit Draoken Ooge käönt dei Forschkers besünners deip in dei freuhe Tied van dat Universum kieken. Mit dei Nao-Infrarot-Kamera (NIRCam) nöhm Pérez-González mit siene Mannschkup eine lüttke Stäe an'n Hemmel mehr at 100 Stünnen lang dör eine Riege Filters up. Ut 80.000 funnen Lecht-Stäen söchden sei dei ut, dei woll dei echt wiet weg liggen Galaxien wän kunnen.

Optical Solutions Incorporated (OSI) bawde aale refraktiven Bildwies-Optiken för dat Lockheed Martin NIRCam-Instrument. Disse Nao-Infrarot-Kamera is dei wichtigste Upnaohme-Apparaot för dat Draoken Ooge Teleskop (JWST), dat in dei Infrarot-Wellenlängten van 0,6 bit 5 Mikrometer upnimmp.

Bild-Daoten: OSI

Dat disse Galaxie-Kandidaoten stark in ultraviolettet Lecht lüchten daut, fallt besünners up. Jüst up so'n Lecht töff man bi Sterne, dei jung sünd un orig väl Masse häbbt. Dat is wohrhaft interessant, aower uck ein grotet Raodel: Nao dei künnigen Modelle har dat Universum don noch gornich naug Tied hatt för dat Affkeuhlen van grote Gas-Massen, dei sick dornao tau dichte Wulken tausaome trücken. Dorut entstünnen dei eiersten Sterne.

Dei eiersten (primordiaolen) Schwarten Löcker nao den Urknall. Bild-Daoten: Ludgerd Lüske

För ein anneret Verkloren nimmp man dei so neumten eiersten (primordiaolen) Schwarten Löcker: Anners at normaole Schwarte Löcker, dei ut starwen Sterne entstaoht, sünd dei all in Sekunnen-Deile nao den Urknall entstaohn. Lüttke Verdickungen in den freuhen, orig dichten un heiten Kosmos kunnen bi wisse Möglichkeiten forts tau orig lüttke Schwarte Löcker tausaome fallen.

Ein Schwartet Lock sugg eine grote Gas-Wulke in und maokt dorbi einen straohlen Lechtkring.
Bild-Daoten: Wikimedia — Graofik-Bild

Süh ein Video dortau: NASA

Bi dat Verschwinnen van dat rund ümme liggen Gas in ein Schwartet Lock wörd dit Materiaol däget heit un kunn recht väl Straohlung affgäben. Bi dei grote Wiete kunn man dit Lüchten licht mit dat Lecht van junge Sterne verwesseln

Dat nächste Bild wiest unsichtbore Nao-Infrarot-Wellenlängten, dei man in sichtbore Lecht-Farwen äöwerdrägen dö. Dei Farw-Schläödel wiest an, wecke NIRCam-Filters man bi dei Upnaohmen bruukde. Dei Farw-Balken ünner dei Filter-Taohlen wiest dei sichtboren Lecht-Farwen, mit dei man dat IR-Spektrum wiesen will.

Bild-Daoten: NASA

Dei Form van dat Lecht kunn ein Wiesteiken wän: Süht man ein Lecht at Punkt, passt dat eiher tau ein Schwartet Lock, süss ein Schwartet Lock mit väl Masse is in'n Vergliek tau eine heile Galaxie recht lüttket. Süht man aower ein Lecht, dat wiet uteinanner driff off nävelig is, kunn dat eiher einen Stern-Hoopen wiesen.

Nao dei vörliggen Daoten häbbt wecke Kandidaoten würklick eine Punkt-Form. Ein Drüddel kunn so tau dat Bild van primordiaole Schwarte Löcker passen. Man dei Daoten sünd noch tau minne, dat man wisse säggen kann, wat disse Deile würklick sünd. In disse freuhe Tied kann man dat Universum blots schwor ünnerseuken. Uck Draoken Ooge warket hier an dei Grenze.

Primordiaole Schwarte Löcker kunnen hier verkloren, wo dei orig groten Schwarten Löcker entstünnen, dei man so freuh in junge Gakaxien finnt. Wenn dei all so freuh dor wörn, dön dei vellicht dei "Saot" wän för dei läöter naokaomen kosmischken Schwor-Gewichte.

Microwellen-Achtergrund. Bild-Daoten: Wikimedia

Besünners wichtig dorbi is dei kosmischke Mikrowellen-Achtergrund-Straohlung — wisse dat öllste Lecht in't Universum un ein "Kinner-Foto" van den Kosmos, upnaohmen bi rund 380 000 Johre nao den Urknall. Wenn et in disse freuhe Tied primordiaole Schwarte Löcker geef, kunnen sei dat Materiaol-Verdeilen ännern un lüttke Spauers in dit Achtergrund-Lecht achterlaoten.

Disse Spauers wören woll orig fien. Use Korten van den Mikrowellen-Achtergrund, dei wi vandaoge häbbt, sünd noch nich scharp naug. Dorümme kann man mit disse Korten dei Idee van primordiaole Schwarte Löcker nich nau naowiesen un uck nich wisse utschluten. Dei kunnen aower läöter vellicht at ein wichtigen Test bruukt wern.

Kort säggt: Dei Daoten läwert wunnerbore Wiesteiken, aower noch kienen Bewies. Vellicht seiht wi hier dei eiersten Stern-Inseln van'n Kosmos — vellicht uck Spauers van urolle Schwarte Löcker. Noch teuwt wi up ein wisset Bild dorvan, waneiher dei eiersten Galaxien un Schwarten Löcker entstünnen. Draokenooge, bliff wachsam!