Eierstet Bild van Jupiter mit Draokenooge

van Ludgerd Lüske



Draokenooge knipst IR-Upnaohmen van Jupiter. Bild-Daoten: Webb: NASA

Draokenooge (Webb Space Telescope) is dat gröttste Weltraumteleskop up dei Welt, dat man bit nuhen bawde. Draokenooge werd noch mehr unbekannte Saoken in use Sünnensystem finnen, un äöwer wiete Welten üm annere Sterne kieken.

Mit gewaltge Stürme, starke Winde, Auroren un extreme Temperatur- un Druckbedingungen hätt Jupiter väl tau bewarken. Nu hätt Draokenooge van dei NASA neie Biller van dissen Planet upnaohmen. Dei Jupiterbiller van Draokenooge käönt för dei Forschkers mehr Wiesteiken gäben äöwer dat Jupiter-Binnenläben.

Disse Biller stammt van dei Draokenooge-Naohinfrarotkamera (NIRCam), dei drei besünnere Infrarotfilters hätt, womit man disse Planet-Ansicht wiesen kann. Infrarotlecht kann dat Menschken-Ooge nich seihn, so hätt man dit Lecht up dat sichtbore Spektrum affbillt. Meistied laotet dei längeren Wellenlängten mehr rot un dei kötteren mehr blaw. Dei Forschkers warkt tausaome mit dei Citizen Scientist Judy Schmidt, dei dei Draokenooge-Daoten in disse Biller äöwersettet.

In dei Ansicht van Jupiter, dei man ut ein Mischken van Bilddaotensätze van Draokenooge tausaomesetten dö, reckt sick Pol-Lechter (Auroren) äöwer den Jupiter-Nord- un Jupiter-Südpol. Dei Pol-Lechter lüchtet in ein Filter, dat rötlick affbilt. Uck dat Lecht, dat van van dei neern Wulken un bäöweren Dunst kummp, werd dütlicker. Ein anneret Filter, dat gäl un greun affbillt, wiest Dunst, dei sick üm den Nord- un Südpol dreiht. Dat darde Filter, dat up blaw affbillt, wiest Lecht, dat van eine deiper liggen Hauptwulke reflekteiert werd.

Dei groote Placken, dei beneumte Storm, dei so groot is, dat dei Eern dorin passt, lätt in dit Bild witt, jüst so as annere Wulken, wiel dei väl Sünnenlecht reflekteiert.

Dei "Vörfohr" van "Draokenooge" James Webb, dat öllere Teleskop Hubble, knipste ein Bild van Jupiter in dat "normaole Spektrum":


Bild-Daoten: Hubble: Wikipedia

Hier süht man uck, dat Draokenooge väl scharper kieken kann as dat öllere Hubble-Teleskop.


Südollnborger Platt: Ludgerd Lüske, nao NASA

24.8.2022


na baven