Bucklige Gegend!
|
Güllen Oktober
vun Antje Heßler
Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Nu is he bald vörbi, de güllen Oktober! Wedder hett he
uns en poor Sommerdaag schinkt. To schöön, wenn de deep
stahend Sünn dat bunte Loov güllen farvt. De Wind sik nich
röögt. De Bläder langsam up de Eer sweevt. Up den Weg
in'n Wohld de blankputzten Kastangeln liegt. Bi jeden Schritt dat
Loov ünner de Fööt raschelt. De Tied mütt man
nütten un geneten.
Wi
hebbt an so'n Dag en Fohrt na de Gootsgoorneree Sierhagen maakt. Uns
Weg güng över Nevenwege bargup un bargdaal dörch Sleswig-Holsteen.
To schöön, baben up enen Anbarg höllen wi an.
Keken in't Land över de frisch ümplögten Feller. To'n
Deel weer al de niege Saat uplopen. Dat frische Gröön lüüch
in'n Sünnenschien. Wi kunnen uns gor nich satt sehn.
"Kiek
mal, sühst Du den Turm dor baben up den Barg, den Gömnitzer
Barg?", fraag mien Mann. "Dat is en Seeteken, en Landmark
för de Tramünner un Lübecker Seelüüd. De
dachte Luftline vun hier bit na de Münnung vun de Harkenbäk
in Meckelnborg gellt ok as Grenz för de Fischeree!"
Dor heff ik eerstmal dat Auto an den Stratenrand stellt. Dat müssen
wi uns doch genau ankieken. Schaad, dat ik nich mehr up den Gömnitzer
Barg un up den Turm kladdern kunn. De Barg is mit 93,80 m na den Bungsbarg
de tweethööchst Barg in Sleswig-Holsteen. Vun dor baven
harrn wi bi dat klore Weder seker de Oostsee sehn kunnt.
Weg na Sierhagen
Uns
Fohrt güng wieder up Feldwege dörch de Knicklandschop. Mitünner
weer de Knick ünnerbraken un geev uns enen herrlichen Blick in
de Landschop frie. Wischen wesseln sik af mit nich afmeihte Maisfeller.
Up de Wischen grasen noch Starken. Mit en Rick weern de apenen Stellen
tosparrt. Dor müssen wi doch noch mal anhollen. Glieks kemen
de nescheerigen Starken bit dicht an dat Rick.
Nu kregen wi aver langsam Kaffeedöss. Bi herrlichen Sünnenschien
kemen wi in Sierhagen an. Uns eerst Gang weer in dat Palmencafe. De
Blomen kunn ik later bekieken. De Terrass weer vull Gäst. Wi
harrn richtig Glück, dat wi noch enen frie'n Disch afkregen.
All Gäst wull'n noch buten sitten un den warmen Sünnenschien
geneten.
Palmencafé Sierhagen
Nadem
wi Kaffee un leckern Koken to uns nahmen harrn, hebbt wi uns den smucken
Goorn ankeken. Överall lüchen in de Blomenbeet hoge bunte
Stauden. Mank verscheden Ziergräser keken Astern, Fetthennen,
Kerzenknöterich un anner smucke Harvstblomen in de Sünn.
Ik kunn mi gor nich satt sehn. Dor weern eenige Planten mank, de ik
nich kenn. Mi un ok mien Mann gefull ganz besünners en hoge lila
Bloom. Mit ehr kräftig lila Farv heev se sik goot vun de annern
Blomen af.
Dor
müss uns de Goornerin helpen. Eisenkraut Verbena
officinalis weer de Naam vun de Plant. Iesenkruut kunn ik mi goot
marken, heff ik dacht. Aver to Huus harr ik den Naam doch wedder vergeten,
tominnst den latinschen. Dat geev to veel Verbenaoorten. Na veel Söken
heff ik em denn doch funnen: argentinisches Eisenkraut
Verbena bonariensis.
Up
unsen Rundgang dörch den Goorn wöörn wi noch grote
Birnbööm un achter de Muur ole Eekbööm wies. De
een Boom sull al 400 Johr old sien. Över en lütte Brüch
kemen wi wedder na den Parkplacken. Dor krall sik en Brummelbeerrank
an dat Büxenbeen vun mien Mann fast. He schimp luuthals los.
Vörsichtig heff ik de Rank lööst. "Kiek doch blots
mal, wat de för en smucke Klöör hett!"
Ik weet enen Eekboom...
Endlich seten wi in uns Auto. Wedder över eensame Landstraten
güng uns Weg na Huus. Överall stünnen ole Eekbööm
an den Stratenrand un leten letzte Sünnenstrahlen dörch
dat Loov. Ünner en ole Eek, bewussen mit wilden Efeu, keek en
ole Strohdackkaat up de Straat. "Finkenbusch 1" stünn
up en Stratenschild. De Kaat müss ik doch noch knipsen.
"Nu maak aver dat wi na Huus kaamt", reep dor mien Mann
al wat ungedüllig. Bi Sünnenünnergang weren wi endlich
wedder to Huus. Dor hett uns dat Avendbrot goot smeckt un wi hebbt
noch vun unsen Utflug swärmt. Goot dat wi dat maakt hebbt. Dicken
Nevel begrüss uns an annern Moorn. De Nevelmaand mell sik an!
Blick vun'n Balkon
To'n Anhören hier klicken:
Lesen deit Antje Heßler in holsteiner Platt.
|