Uns Fröhlingsbaden

...fotografeert vun Antje Heßler


Hüüt is de 1.März, dat kalendarische Fröhjohr is dor, aver mit Ies un Snee! De lütten Blööm laat sik aver nich verdrieven. De Krokusse, Winterlinge un ok de Märzenbeker steekt de Köpp dör de Sneedeek. Ik heff se glieks wedder knipst.

WinterlingeDe eerst, de sien Nees dör de Sneekruste purrt, is de Winterling. He kümmt faken al in'n Hornung ut de Eer un blöht. Is dat to verstahn? In'n Hornung gifft dat doch noch gor keen Insekten, de sin lüchten geele Blöden bestäuben kunnen! Woans kann sik düsse Plant denn "fort-pflanzen" (hier also wöörtlich)? Avers dorför hebbt doch de Blööm ehr schöne Klören — dat se Immen un anner Insekten anlockt? Keen Imm is so dösig, nu buten rümtohummeln — un keen Hummel ok nich. Bloots ik mit den Fotoapparaat! Kaamt de Winterlinge villicht dorüm so fröh ut dWinterlinge Eer, dat se uns Minschen mit ehr sünnengeele Klöör en Freud maakt?

Sünnerlich antomerken is, dat de Winterling, de to de Hahnenfußgewächse höört, en Giftplant is. In de Knollen, de ünner de Eer sünd, stekt en Hartgift, mit dat een en hartswacken Minschen ümbringen kann. Op keen Fall de Knollen vun de Winterlinge eten! Vundaag geiht dat sowiso nich, denn de Borrn is fraren.

Märzenbeker un Winterling

De Märzenbeker, ok "Grote Sneeklock", de in dat Foto baven blangen en Winterling tapfer dör de Sneedeck brickt, kümmt faken ok al in'n Hornung — se maakt den Winterling bannig Konkurrenz! Mit welk basige Knööv de so feen Blöden dör den fraren Borrn brekt, dat hett Anke Nissen hier opschreven. De Märzenbeker is en Zippelplant un hett dat geerMärzenbekern beten natt an'e Fööt. De Zippel hett dat wedder in sik: Ok hier stekt en Hartgift binn! Avers ok in de ganze Plant. Kann dat Tofall ween? Villicht brukt de Planten düsse giftigen Substanzen, dat se de Küll wedderstahn köönt? — Wat en Glück, dat de Deerten de Plant nich in grote Mengen affreet! Stunnen de Wischen in Sommer so dicht vull Märzenbeker as vun Löwentehn, denn stunn dat slecht üm de Köh — se wöörn sachs dood ümfalln. Man de Märzenbeker blöht hööchstens bet April, denn is Sluss för em.

Mit den Märzmaand kümmt denn ok de schöönste vun uns Fröhlingsbaden: De Krokus mit sin vele lüchende Klören — blaag, geel, vigelett.... Wenn he utblöht hett, is de Lent vull da. De Krokus, en Liliengewächs, hett blangenbi heel vörnehme Verwandtschap: Ut den Safrankrokus warrt de berühmte Safran wunnen, "Safran maakt den Koken geel", Se weet al. 100.000 Krokusblöden bruukst för 1 Kilo Safran!! Dat sünd nämlich bloots de Stofffadems, de dorto bruukt warrt. De warrt utreten un dröögt un geevt denn dat kaptaale Safranaroma. Na, dor is denn tominnst wohl keen Gift in... Man unsen Krokus riet wi keen Stofffadem nich ut, nee, de dröff he behollen. Much he sund ut den Snee stiggen un den nahen Lent künnig maken!

Krokus



na baven