Nao dat problemlose Ankaomen van den neiesten ESA-Mars-Orbiter maoket sick dat ESA-Leit-Zentrum praot för ein grootet Wark: dat Induuken in dei Atmosphäre van usen Naoberplanet för eine passen Ümloop-Baohn.

Trace Gas Orbiter (TGO) äöwer den Mars. Bild-Daoten: ESA / ATG medialab

Dei ExoMars Trace Gas Orbiter (TGO) is up eine mehrjöhrige Mission, wobi dat minnste Maot an Methan un an annere Gase in dei Mars-Atmosphäre söcht werd. Disse Gase kunnen ein Bewies för biologischke (Methan) off geologischke Aktivitäten wän.
Nao siene lange Reise van dei Eern her geef dei Sonde den Hauptmotor an'n 19. Oktober Brems-Für. So bremste dei TGO naug aff för dat Infangen dör dei Planet-Schworkraft. Dat Ruumfohrtüg güng äöwer in einen hoch elliptischken Ümloop, wobi dei Höchte tüschken rund 250 km un 98000 km leeg. Dorbi duurt jede Ümloop veier Eerndaoge.

Dei Wätenschkup-Plaon un dei Rulle as Daotenäöwerdräger för dei Rovers up den Marsbodden maokt et nödig, dat sick dei TGO up eine kringförmige Ümloopbaohn in eine Höchte van 400 km bringen mutt. Dorbi duurt jede Ümloop rund twei Stünnen.

Dei Atmosphärenbremsung: eine groote Upgaobe

ExoMars (TGO) dat eierste Johr in dei Ümloop-Baohn. Bild-Daoten: ESA

Dat ESA-Leit-Zentrum werd dei Atmosphärenbremsung insetten. Üm dat hentaukriegen stürt man dat Ruumfohrtüg dör dei dünne Atmosphärenkante mit minne Luftgägendruck. So flügg dei Sonde staodig deiper daol.

"Dat Maot van den Luftgägendruck is orig minne", sägg Peter Schmitz, hei hätt dat Leit äöwer dei Ruumsonde, "aower nao 13 Maonde werd et naug wän, so dat man bi dei plaonte Hööchte van 400 km ankummp. Dorbi mutt dei Motor blots ein poor Maol brennen; so spoort man Driewstoff."

Information tau dei Atmosphärenbremsung: hier.

Bi dei Atmosphärenbremsung mutt dei ESA-Leit-Mannschkup in Darmstadt up dat Fohrtüg bi jeden Ümloop nau uppassen, dat et nich tauväl Riewhitte off Druck affkrigg.

Dei Luftgägendruck werd van Baohn tau Baohn schwanken dör dei sick ännern Atmosphäre, dei Stoffstörme un dei Sünnenaktivität. Dorümme mäötet dei ESA-Flugdynaomik-Mannschkuppen dei Ümloop-Baohn fäökener naomäten, dat dei nich tau sachte off tau fosse afffallt.

Dei heele Atmosphärenbremsung schall an'n 15. März losgaohn, wenn dei Mars jüst äöwer 300 Millionen Kilometer wiet van dei Eern wäge is, un duurt bit 'n Anfang 2018.

Start-Plaon

Dat ESA-Leit-Zentrum warket nu stramm doran, dat dei Sonde, dei Fleigplaon un dei Bodden-Systeme för dei Aktion praot staoht.

Tau eierste werd man an'n 19. Januar 2017 den Winkel van dei Ümloopbaohn up 74° tau den Mars-äquator instellen. So kann man för dei Wätenschkup den gröttsten Deil van den Planet upnähmen.
Dornao werd dei Baohn-Hochpunkt an'n 3. un 9. Februar 2017 deiper settet. So kummp man in einen Ümloop, van den ut dei Atmosphärenbremsung anfangen schall. Dorbi gaiht dei Ruumsonde up einen 200 km x 33475 km Ümloop, för den sei 24 Stünnen bruuket.

ESA-Leit-Zentum. Bild-Daoten: ESA/P. Shlyaev

Dat ESA-Leit-Zentrum hätt wat Erfohrung mit dei Atmosphärenbremsung bi den Venus Express, uck wenn dat dorbi an't Ende van dei Mission as Demonstration afflöp. Dei NASA bruukte dei Atmosphärenbremsung bi den Mars Reconnaissance Orbiter un bi annere Ruumfohrtüge. Dei bröchde man so in leegere Ümloop-Baohnen üm den Mars.

"Dit is woll dat eierste Maol, dat man mit eine Atmosphärenbremsung up eine Insatz-Baohn kummp. Dorbi nützet wi dei Tied baobenskoop dortau, dat use Pläöne stabil sünd un wi för besünnere Fälle praot staoht", sägg Fleigdirektor Michel Denis.

Bremsanfang

Dei wohre Atmosphärenbremsung fang an'n 15. März 2017 mit eine Riege van säben Driewwark-Füürstöts an, mit einen Stoot aale drei Daoge. Dorbi minnert sick staodig dei Höchte van dei Ruumsonde up dei naokaomen Baohn — so tüschken 200 km un 114 km.

"Denn kann dei Atmosphäre losleggen un us nao unnen trecken", sägg Peter Schmitz. "Wenn aals nao Plaon loopen dait, verbruukt wi blots recht minne Driewstoff bit tau'n End van dei Atmosphärenbremsung anfang 2018, wenn dei leßten Zündungen den 400 km grooten Ümloop affrundet."

ESA-Flugdynaomik-Mannschkup. Bild-Daoten: ESA / J. Mai

Ein Daotum is nich fasteleggt, aower dei Upnaohmen för dei Wätenschkup käönt anfangen, wenn dei plaonte Ümloop-Baohn vörligg. Dorbi kann up disse Baohn dei Sonde twei bit drei Maol jeden Mars-Rover an jeden Dag äöwerfleigen tau'n wiederleiten van dei ehre Signaole.

Dat Ruumfohrtüg is best tauwäge

Dei Ruumsonde is best tauwäge. An'n 30. November 2016 kreeg sei ein aktualiseiertet "Bedriewsystem". Bit dorhen feuherde man blots einen "sekeren Modus", bit ein Fähler dat System nei starten löt un dit nu up Korrekturbefähle teuwen dö. Dat passeierde bi dat vörweg gaohn Utprobeiern van den Hauptmotor, as man dorbi einen fählerhaften Taustand gau fünnt un repareiern kunn.

"Wi frait us, dat wi so ein bestet Ruumschipp fleiget", sägg Michel Denis. "Wi häbbet eine besünnere un rutfödderne Upgaobe vör us liggen."

Taueierste rutbröcht up Operationen der ESA-Website
Video
Artikel