Schiaparelli — Upschlag-Stä up den Mars

van Ludgerd Lüske



Use Naoberplanet Mars. Klick up tau'n Vergröttern! Bild-Daoten: ESA

Fief Daoge nao den Upschlag van den ExoMars-Lander "Schiaparelli" weit man mehr äöwer dei Ursaoke. Dei Fallscherm van den Landeapparaot sprüng as plaont aopen. Denn wörd dei tausaome mit dat achterste Hitteschild tau freuh affschmäten. Dorbi harren dei Schuuwdüsen blots 3 bit 4 anstä van dei plaonten 40 bit 60 Sekunnen zündet. So füllt dei Lander ut eine gröttere Höchte as beräket un mit groote Geschwinnigkeit daol.

Schiens is dei Software van dat Radar dorför dei Urhäwer. Dei Software van den Radar-Höchte-Mätapparaot hätt nich richtig mit dei System-Navigationssoftware tausaomewarket. Et geef einen Timeout*, dei dorför sorgde, dat dei Fallscherm 'n bäten tau freuh affsprengt wörd, un dei dorför sorgde, dat dei Landeapparaot glöwen dö, dat dei all up den Marsbodden stünd. So stellde dei uck dei Bremsraketen tau freuh ut.

Dei ESA glöwet, dat dei Sonde ut rund twei bit veier Kilometer in'n freien Fall affstört is. Dornao is dei Sonde mit den noch nich verbruukten Driewstoff explodeiert.

Wenn man läöter nau weit, dat dit dei Ursaoke was, kann man dissen Fähler lichter wegkriegen as einen Fähler in't Design off in dat Vullkonzept van den Lander. Dat wör wiss günstig för den Finanzplaon van dei 2020 plaonte Mars-Fohrtüg-Mission.

Quelle: Interview Deutschlandfunk mit Dr. Rolf Densing, 24. Oktober 2016. Süh uck hier.

Nu giff et neie Biller van dei Upschlag-Stä up den Mars in Farwe, knipset van eine ümlopen NASA-Sonde.


Neie hochuplöste Biller van eine ümlopen NASA-Sondewieset Deile van dat ExoMars Schiaparelli-Modul un dei Landestä up den Mars in Farwe. Bild-Daoten: ESA — affännert

Schiaparelli köm an'n 19. Oktober 2016 bi dei Meridiani Planum-Region an, wobi dei Maudersonde (TGO) in den Marsülop inschwenkde. Disse Trace Gas Orbiter schall sien eierstet Wätenschkup-Ünnerseuken up twei van siene hocheliptischken Ümlop-Baohnen van den Mars maoken, dei tausaome acht Daoge duurt un an'n 20. November anfangt. Dorbi werd dat TGO uck dei eiersten Biller van dissen Planet nao sien Ankaomen upnähmen.

Dat neie Bild van Schiaparelli un siene Harwaredeile knipsde an'n 01. November 2016 dei Mars Reconnaissance Orbiter (MRO) van dei NASA. Dei eigentlicke Upschlagstä ligg middig in den Bildstriepen, dei dei hochuplösen Kamera dör drei Farwfilters mök. Dorut kunn man ein Farwbild tausaomestellen.


* In Computer-Netwarke bedüet Timeouts dei Tied, dei ein System teuwen dait, bit eine Antwort kummp, vördem ein Daotenpaket as Verlüß gellt un vellicht noch maol tau äöwerdrägen is (retry), off dei Kommunikation mit einen Timeout-Fähler affbraoken werd (Tiedgenze in dei Netwarktechnik).


Südollnborger Platt: Ludgerd Lüske, nao ESA-Artikel
9.11.2016


na baven