Dei DART-Mission

van Ludgerd Lüske


Tataaa! (Dramaotischke Musik...): Ein Asteroiden-Inschlag drauht! Tau Hülp! Wat doon? — In Hollywood äövernimmt nu Bruce Willis un reddt dei Welt. Käönt wi ok aohn em äöverleven? Nao wisslich: Dorför start dei NASA un Partners nu dei DART-Mission. DART steiht för Double Asteroid Redirection Test, also Duppelte Asteroiden-Richtungsännern-Test. Ein Video (up Hoochdüütschk) gifft dat hier.


Lage des Chicxulub-Kraters auf der Halbinsel Yucatán. Bild-Daoten: Lüske

Dei Menschken sünd mit Recht bange, dat maol ein Asteroid-Inschlag passeiert. Dat Utstarwen van dei Dinosaurier kann man mit so einen Inschlag verkloren. Dei gewaltige Wucht vun so ein Natuurkatastrooph wiest t.B. dei Chicxulub-Kraoter in Mexiko. — Wat käönt dei Menschken daun, wenn so ein geföhrlicken Asteroidenbrummer up dei Eern taustüert?


Inschlag un Tausaomedrücken van dei Eern-Schichten in'n Chicxulub-Kraoter. Bild-Daoten: Lüske nao Gordon Robert John Cooper, Universität des Witwatersrand

In dat Johr 2005 dö man 1822 km seismischke Reflexionsdaoten faoten, dei den massiven (200+ km) Chicxulub-Inschlagkraoter wiest. Süh uck hier: Topography of the Chicxulub impact crater.

DART is dei eierste Mission, dei sick mit ein Ünnerseuken un dat Utprobeiern van ein Asteroid-Afflenken befaoten dait. Dorbi verännert sick dei Baohn van einen Asteroid in den Weltruum dör einen kinetischken Inschlag. Hierbi stött DART mit Affsicht mit einen anpielten Asteroid tausaome — dei bedroht use Eern aower nich. Geschwinnigkeit un Baohn schäöllt so anners wern. Dat T in DART steiht ja för "Test"!


DART-Mission-Äöwersicht. Bild-Daoten: Lüske, nao DART-infographic-Bild

DART steeg, as plaont, an'n 24. November 2021 up. Siet dei Tied löpp DART up eine eerdnaohe Baohn üm dei Sünne up den Asteroiden Didymos tau. Dat is dei, den sei sik as Testobjekt utkeken hefft. Up den Weg dorhen schall DART noch twei annere eerdnaohe Asteroiden, CB21 un Orpheus, beobachten. Dorbi knipst DART Biller in dat sichtbore Lecht-Spektrum. Midde September 2022 schall dei LICIA-Kassen-Satellit (LICIAKas) van DART affspringen. (Mehr äöver Kassensatelliten hier.) An'n 26. September 2022 schlait DART up den Asteroid Dimorphos in. LICIAKas knipst bi't Vörbifleigen dissen Inschlag. Tau disse Tied is Didymos blots 11 Millionen km van dei Eern weg, so kann man van dei Eern ut den Inschlag mit optischke Teleskope seihn. Dat Lowell Discovery Telescope van dat Lowell Observatory in Arizona un uck Radarsysteme staoht hierför praot.


LICIAKas, dei Kamera-Satellit. Bild-Daoten: Lüske

LICIAKas, dei Laodung van DART, werd van dei Agenzia Spaziale Italiana (ASI) bistüert un van Argotec bawt. LICIAKas werd van DART so teihn Daoge vör den Inschlag van DART utsettet. Disse Mini-Sat schall Biller knipsen van disse Weltruum-Aktion.


Inbau van den LICIA-Kassen. Bild-Daoten: www.jhuapl.edu, ännert

Dei twei Forschkers baoven seiht taufreden ut. Un as dei Italieners sünd ("Design mutt sien!"), hebbt sei sik ein eigen un väl schöneres Logo för ehr Deil-Mission maokt:

Dei Satellit Hera schall 2024 nao Didymos fleigen un dor 2027 ankaomen. Dat dör den Inschlag bewarkte Baohn-Affwieken van Dimorphos kann HERA denn utmäten. Mit siene Kas-Sats (Cubesats) MILANI un JUVENTAS knipst un vermät HERA dei Asteroiden un dei Inschlagstäe, un maokt chemischke Anaolysen un faotet dei Masse.

Dei Reiseweg van DART gaiht up dat tweideilige, eerdnaohe Asteroidensystem Didymos tau. Didymos hätt bold einen Dörmäter van 780 Meter un dei lüttkere Dimorphos is bold 160 Meter lang un löpp üm den grooten Asteroid tau.


Gröttenvergliek bi dat Asteroid-Twillingssystem.
Bild-Daoten: Lüske, nao dart.jhuapl.edu-Bild

DART kann up Dimorphos inwarken, dorbi ännert sick siene Ümloop-Baohn. Dei DART-Mannschkup will dei Resultaote van den kinetischken Inschlag van DART up Dimorphos mit orig naue Computersimulationen van kinetischke Inschläge up Asteroiden verglieken. Up disse Ort werd dei Wirkung van dit Minnerungsvörhäbben faotet un ünnersöcht, wi man dat an'n besten bi taukaomen planetore Verteidigungsansätze bruuken kann. Wie nau dei Computersimulationen sünd, un wie gaut dei dat Verhollen van einen echten Asteroid wiest, kann man so rutfinnen.


DART-Satellit mit Ionenantrieb. Bild-Daten: DART (jhuapl.edu)

Süh uck hier: Video-2

Wat dei DART-Mission bringen schall:

  • Einen kinetischken Effekt mit Dimorphos wiesen,
  • Ännern van dei Ümlopp-Tied van Dimorphos,
  • Insatz van boddennaohe Teleskopbeobachtungen,
  • tau'n Mäten van dat Ümloopännern van Dimorphos vör un nao den Inschlag,
  • Mäten van dei Upschlagwirkung un dat dorbi utschmäten Wark up Dimorphos.


Original-Datei: DART (jhuapl.edu). Südollnborger Platt: Ludgerd Lüske

17.9.2022


na baven