De Roos Cinderella

vun Antje Heßler

De Roos tellt to de Familie vun de Rosengewächse, d.h. se sünd en egen Familie in de Plantenwelt. To de wietlöftige Verwandtschap höört ok Appel, Beer, Mandel- un Plummenboom; se sünd ok Rosengewächse. Wi wüllt aver de Bloom bekieken, denn wenn wi "Roos" höört, denkt wi nich an en Appel.

Dat gifft wilde Rosen un Goorn- oder Parkrosen. Dat sünd de Edelrosen. De Edelrosen sünd vun de Goorners tücht. Se snackt denn vun Kulturrosen. Al över 2000 Johr warrt Rosen tücht. In de greeksche Antike wöör se as "Königin vun de Bloom" betekent. Un dat is se hüüt ok noch.

Cinderella hett en füllte Blööd, da kribbelt de Insekten nich so dull

Ut de Rosenblödenbläder warrt Rosenöl wunnen. Dat warrt för Rüükwater un Seep bruukt. De Ruuch vun Rosen is besünners bi de Fruunslüüd beleevt.

Cinderellas Haagbutt

De Rosenplanten dreegt in'n Sommer en gröön Kleed. An den Stamm un de Telgen sitt veel spitz un scharp Döörn. "Keen Roos ahn Döörn"! Dat schütt de Plant gegen den Fraß vun Deerten. Mennig anner Planten mit datsülve Problem hebbt desülvige "Idee" hatt, t.B. de Kaktus.

De Blöden vun de wilden Rosen hebbt fief Blödenbläder. De tüchten Rosen hebbt oftins veel mehr. Ut de Blöden warrt den later Haagbudden. Mit ehr kräftig rode Farv smückt se in de Harvsttiet ok noch wedder de Goorns, Parks un de Hecken.

Mit Cinderella is noch överhaupt nix los!

Cinderella berappelt sik!

Letzt Fröhjohr heff ik en Edelroos, en Märkenroos, schinkt kregen. Se keem ut en groot Goorneree. Dor harr se mit veel anner Rosen teemlich eng bieenanner stahn. Üm ehr'n Stamm weer en Band knütt. Dorup stünn de smucke Naam "Cinderella".

Cinderella maakt sik fein rut

Ik heff se in enen groten Blomenputt plant un bi mi up de Terrass stellt. Dor harr se Platz un kunn sik utbreden. So kunn ik se den ganzen Sommer över bekieken un harr veel Freud an ehr. Se hett mi denn vertellt, wosück se to den smucken Naam Cinderella kamen is:

Cinderella.

In't Beet is dat drang

Dat weer mal en lütt Roos. De stünn in en groot Rosenbeet, meern mang anner Rosen. Se weer noch bannig lütt. De annern Rosen weern all ornlich wat gröter. Welk harrn al Knuppen un welk sogoor al Blöden. De Goorner harr al Namensbänner üm de Stöck knütt. Se kregen wunnerbor Naams. De en heet Penelope, en anner weer en Lady un sogoor en Prinzessin weer dormang. Enes Dags wöörn se utbuddelt un güngen up de grote Reis.

Uns lütte Roos harr gor to geern wüsst, woneem de Reis hingüng. Se wull ok gröter warrn, wull ok enen Namen kriegen un up grote Reis gah'n. Se geev sik so veel Möög. Aver se harr nich noog Knööv. Ehr Naversch möök sik gor to breet. Keek up de lütt Roos hindaal un lach se sogoor noch ut. De langen Stengels vull Dornen un Blöden strecken sik över de lütt Roos un decken se meist to. Kuum dat se noch Luft kreeg.

Nu harr de Goorner ehr Naversch ok en Band üm den Stock bunnen. Se höör up den vörnehm Namen "Lady Hamilton". Vun dor an dröög se den Kopp noch höger un snack mit de lütt Roos keen Wort mehr. An neegsten Dag kemen de Goorners un buddeln "Lady Hamilton" ut. Se güng ok up de grote Reis. Endlich kunn de lütt Roos wedder Luft halen. Se möök sik richtig breet. Ehr Telgen strecken sik in de Hööcht un setten glieks Knuppen an.

An annern Dag kreeg se Besöök vun en poor Dacklünken. De vertellen sik dat Nieste vun de Welt. De en Dacklünk harr tokeken, as de Rosenstöck in en groot Lastauto packt wöörn. En anner Dacklünk wüss, dat de Rosenstöck in enen groten Park kamen sullen. Wenn se doch man ok eerst so groot weer un enen Namen kreeg! Denn kunn se seker ok up Reisen gahn.

Vadder un Söhn Dacklünk

Uff, is dat en Gedränge!

Sünnenschien un Regen wesseln sik af un leten uns lütt Roos in de letzten Weken düchtig ranwassen. Se harr dorbi richtig Wehdaag in ehr Telgen. En Knuppen na den annern keem an't Dageslicht. An annern Dag weer een Knuppen upblööt. Se weer över sik sülvst verdattert. So'n smucke Blööt harr se sik nich totruut.

Cinderella vull Blöden in't Avendlicht

En Dag later keem en Goorner. Ganz verwunnert keek he up de lütt Roos. "Kiek an," dacht he, "de lütt Roos hett sik aver rutmaakt!" He harr doch glieks to den Baas seggt: "Tööv man af, wenn de lütt Roos mehr Platz hett, warrt dat en lütte Schöönheit!" Un dorbi wull sien Baas de Plant al wegsmieten.

Neegsten Dag kemen glieks de Baas un noch en Goorner. Se kunnen sik över de lütt Roos nich noog wunnern. "De mütt en besünners fienen Namen kriegen", meen de Baas. He knütt uns Roos en Band üm den Stock. Mit grote Bookstaven stünn "Cinderella" up dat Band. Wat weer dat för en smucken Naam! Cinderella keek an sik hindaal. Vör luder Freud möök se noch en Knuppen up. En wunnerboren Ruuch vun de Blööt steeg de Goorners in de Nees. "Mit Cinderella gaht wi up de Rosenschau", meen de Baas, "pass up, de bringt uns enen Pries in!"

Cinderella fraagt neeschierig de Lünken

Wat dat wull nu heet, wunner Cinderella sik. Annern Dag kemen de Lünken wedder to Besöök. De wüssen ja üm veele Saken. Villicht kunn se vun de Lünken höörn, wat en Rosenschau weer. Eerstmal vertell se de Lünken stolz, dat se enen Namen kregen harr, Cinderella!

"Cinderella, Cinderella", schilpen de Lünken för Freud mit lude Stimm. De Lünken wüssen ok, dat up en Rosenschau de smucksten Rosen utsöcht wöörn. Dat Priese verdeelt wöörn un de schöönste Roos den eersten Pries kreeg. Dor nehm sik Cinderella vör, noch düchtig to wassen. De Baas sull doch mit ehr, mit Cinderella, enen Pries kriegen. Se kunn gor nich de Tiet aftöven, bit dat so wiet weer.

Cinderella Anfang August

Endlich halen de Goorners se af. Buddeln se ut un setten Cinderella in enen smucken Putt. Mit en swartglänzend Auto güng de Reis los. Se harr düchtig Hartklabastern un weer vun dat Schaukeln in dat Auto meist seekrank woorn. Den Baas harr se kuum wedderkennt, so smuck harr he sik maakt.

Endlich weern se anlangt. In en grote Hall weer de Rosenschau. En barg Minschen lepen dor rüm. De Rosenpütt kregen all en Nummer. Cinderella kreeg de Nr. 7. Fachlüüd keken sik de velen smucken Rosen an. Na'n ganzen Stoot wöörn de Winner upropen. Cinderella truu ehr Ohren nich. Nr.7 weer dorbi! Ehr Baas harr mit ehr enen Pries kregen. "Die Rose mit dem Namen Cinderella erhält den ersten Preis," verkünn en Mann mit lude Stimm.

För Freud kunn Cinderalla sik kuum wedder inkriegen. Dat weer för se de schöönste Dag in ehr'n Leven!

So süht en Märkenroos ut