Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Julimaand:
De Zitronenfalter

vun Thomas Seemann un Marlou Lessing


Nich all Zitronenfalter maakt ehrn Naam Ehr, un dat kümmt, wieldat bloots de Heken deep geel farvt sünd. De Wievken sünd lichtgröön un seht meist ut as en Blatt. In uns Foto hier seht wi en Heken, avers sien Flünken sünd so transparent, dat he mang Bläder ok meist unsichtbor is.

Dat neegst Bild wiest to'n Vergliek en Wievken. Ehr Lindgröön is ganz opak un nich dörsichtig.

De Zitronenfalters leevt in ganz Eurasien. Se sünd Överlevenskünstler un kaamt mit veel ünnerscheedlich Levensrüüm torecht. As eenzige vun uns heimische Bottervagels överleevt Zitronenfalter den Winter ok bi scharpen Frost as Falter (nich etwas as Larve) un warrt so över een Johr oolt. Düsse fee lütt Falter is de Methusalem ünner de Botttervagels. Den Winter verbringt se in Roh an en schuulte Steed un schüddt en Cocktail ut Frostschutzmiddel in ehr binnern Saft: Zuckeralkohole un Proteine. So freert se nich in, denn dat weer ehr Dood. Natüürlich kost ehr dat veel Kraft, düsse Stoffe to produzeern, un nich all Falters överleevt den Winter. — De Zitronenfalter is, as de mehrsten Bottervagels, nich mehr so veel to sehn as fröher, avers he warrt sik nich ünnerkriegen laten.


Dat Heken tosamen mit en Imm


De Imm is weg, uns' Heken hett de Blööt för sik!

Zitronenfalters hebbt ok en ganz zaarten Fleck op de Flünken. Villicht will de Evolution dor ja en groten afschrecken Ogenfleck ut maken — in en poor teihndusend Johr. Oder dat is mal en Ogenfleck west, de sik nu torüchbildt. Denn de Zitronenfalter klappt sien Flünken meist nienich uteneen, wenn he nich jüst rümflattert. In Roh sünd de Flünken jümmers slaten. Villicht brukt he dorwegen den Fleck nich mehr. — Geern wöör ik de Evolution in't Notizbook kieken un weten, wo sik de Fleck verännert. Weet Se dat?

 

Flattern Licht
Blatt vun Huut
dat Geheimnis vun't Flegen
borgen op dien
Binnensiet

dör Tieden un Welten sweevt
bloots en lütt Fleck


1.7.2018


na baven