Aurora!

vun Antje Heßler

Dat gifft wohrhaftig enen Bottervagel mit den smucken Naam Aurorafalter. Aurora is de griechische Göttin vun dat Moornroot. Un düsse lütt Bottervagel gaukel al in den Aprilmaand dörch mien Goorn. He is een vun de eersten Bottervagels in't Johr. Mit sien witten un orangfarvig Flünken weer he nich to översehn. He bröch Farv mank dat fien Hellgröön vun de Planten. De orangfarvig Placken an't Enn vun sien Flünken lüchen mit de Fröhjohrssünn üm de Wett. Den Naam "Aurorafalter" harr he to recht kregen!

Fru Aurora vun baven

Dorgegen is sien Fru mit en eenfach witt Kleed utstaffeert. Se warrt dorüm oftins mit den lütten Kohlweißling verwesselt. Blots bi tosamenklappt Flünken hebbt se beide dat glieke Utsehn. De Ünnersiet is mit griesgröön Placken överseit. So sünd se goot tarnt un up de Blomen un Planten kuum uttomaken.

Herr oder Fru Aurora — bi slaten Flünken kannst dat nich so licht sehn

De Aurorafalter is en Bottervagel ut de Familie vun de Weißlinge. In't Johr 2004 is he vun'n Bund för Ümwelt un Natuurschuul to'n "Schmetterling des Jahres" utsöcht worrn. Dat heet aver to'n Glück nich, dat he bedrauht is! Nee, vun em un sien Aart gifft dat noch noog. Dat hett ok darmit to doon, dat he mit dröög Gelänn liekso good torechtkümmt as mit natte Wischen un sogoor mit Woold. He is en Allrounder.

In de eersten Daag vun den Aprilmaand krüppt he ut de Popp. Denn kann man den smucken Bottervagel al bi't Söken na en Fru andrapen. Unruhig flüggt he vun Blööt to Blööt.

Herr Aurora warrt vun sin Hormone över de wiede Wisch dreven...

Fru Aurora

De Fru hölt sik geern up dat Wischenschuumkruut up. An de Plant leggt se na de Hochtiet ok ehr Eier af. Se is avers ok an anner Blomen antodrapen. Ut de Eier kruupt na en Week lütte gröne Rupen. De Rupen freet sik rund un dick, bit se sik in Juli verpoppt. De gröönlichen Poppen överwintert dicht an de Eer. In dat neegst Fröhjohr kruupt dor wedder smucke Boddervagels rut.

Herr Aurora is in't Gras dalkamen

Ik harr dat grote Glück, dat mi en Aurorafalter bi sien Hochtiet tokieken leet. Wies worrn bin ik em, as he sik an en Wischenschuumkruut güütlich de. Denn flöög he in en natten mit Brennetteln bewussenen Grund. Sien bunten Flünken wiesen mi den Weg. Unruhig flöög de smucke Keerl hin un her. He kreis ümmer wedder üm de glieke Bloom. Versöch sik daaltosetten, aver flöög glieks wedder hoch un flatter unruhig mit sien smucken Flünken.

Fru Aurora hööpt op Herrenbesöök

Dor kreeg ik mit, dat up de Bloom en witten Bottervagel seet. Seker weer dat en Fru. Ganz vörsichtig sliker ik mi dörch de Brennetteln un dat Unkruut dichter an de Bloom mit den witten Bottervagel. Nu kunn ik utmaken, wi se den slanken Achterliev wiet na baben böög. Se seet ganz still un harr ehr Flünken wiet utbreedt. Se tööv richtig up ehren Partner. De versöch ümmer wedder to lannen. Aver dat wull un wull nich klappen. Ik waag kuum Luft to halen. Dat hett tominnst teihn Minuten duurt, bit he endlich richtig landt is.

Nich bloots för minschliche Keerls is dat faken swaar, bi en Fru to lannen!
Herr Aurora versöcht dat hier bi Fru Aurora.

Endlich hett dat slumpt!

He hett sik aver as Gentlemann benahmen. Fien hett he de Flünken över sien Fru utbreedt. Ik kunn blots utmaken, dat dor twee Bottervagels up de Bloom seten! Na en korte Tiet floog he denn wieder. Un se hett ehr Flünken tosamenklappt un sik vun de Sünn beschienen laten.