Dei Artemis-I-Mission: Dat RS-25 Driewwark bi dat Artemis-System

van Ludgerd Lüske



RS-25 Driewwark ünnerwägens för den Inbau. Bild-Daoten: NASA

Dat eierste Daoltellen bi den Start van Artemis I wörd affbraoken, dat tweide hüüt nu ook. Maol geef et Probleme mit dat Keulen van dei Driewwarke, hüüt mit dat Infüllen van den Driewstoff. — Hier wiest wi den Upbau van dit Driewwark.

Dat Aerojet Rocketdyne RS-25 is ein Raketen-Driewwark, dat fleiten Suurstoff as Oxidationsmiddel un fleiten Waoterstoff as Kraftstoff bruukt. Dat Driewwark nütt also dei Knallgas-Reakschoon (meist so as dat Waoterstoff-Auto, dat in Taukumst veel bi uns fohren warrt), aover dei Kraftstoff is fleiten, nich gasförmig.
Dat RS-25 werd nao ein Patent van MBB Ottobrunn tausaome mit Rocketdyne entwickelt. Pratt & Whitney Rocketdyne äöwernöhmen den Bau.

Dat Driewwark hätt eine Masse van 3,2 Tonnen. Dei Schuuwdüse hätt eine Längte van 2,39 Meter. Et hört tau dei Motoren mit dei üppste Leistung in dei Ruumfohrt-Geschichte. Jedet Driewwark schuff mit äöwer 2000 kN, also mit dei Gewichtskraft van 200000 kg. In dei Brennkaomer ligg dei Temperatur bi 3300 °C. Mit Turbopumpen werd dei Kraftstoff mit bold 450 Bar un dei Suurstoff mit bold 300 Bar Druck nao dei Brennkaomer pumpt. Dei Hochdruckpumpen warket mit Dreihtaohlen van 35360/min un 28120/min.


RS 25-Funktionsbild. Klick op tau'n Vergröttern! Bild-Daten: Wikimedia

So at dei Brennkaomer werd uck dei Düse thermischk belastet, so is ein gauet Keuhlen nödig. Bi dat Keuhlen werd dei för dat Keuhlen afftwiegte, kolde Kraftstoff dör dei dubbelwannige Brennkaomer, un uck dör dei dubbelwannige Düsenklocken leitet. Eine besünnere Düsen-Keuhlort is dat Inleiten van den orig kolden Kraftstoff mit Turbopumpen in dei Düsen-Kringleitungen.

Artemis I staiht in'n Oktober wedder praot up dei Startrampe. Wi willt haopen, dat disse drüdde Start-Anloop klappt.


SO-Platt: Ludgerd Lüske

3.9.2022


na baven