Angeln an'n Fehnkanaal

vun Thomas Seemann


Eentlich wull ik den Schilfrohrsänger knipsen, de bloots ganz fröh singt — blangenbi natüürlich Fisch fangen. Den Schilfrohrsänger heff ik nich faatkregen, aver bi't Angeln vun de Nacht bet in'n fröhen Morgen kriggst jümmers vele Deerten to sehn un höörn.

De Poggen singt opleevst avends, aver se quaakt rüm, wenn ik mien Angel in ehr Revier smiet, un warrt ganz schön aggro. Dat weer villicht lustig. Plitsch Platsch! Vunwegen de Sünn kunn ik gor nich good sehn, wat ik em op't Bild kregen harr un in welk Qualität. Hett slumpt.

Intressant weer ok: Sodraad ik nehger rankeem un mien Schadden in'n Kanaal full, woor dat dor ünnen bi de Poggen miteens ganz still. Ik denk, de merkt dat. Denkt villicht, dor kümmt en Stork? Orr en anner Fiend?

Dat Blesshohn kann nich so good flegen, fladdert aver orig dör't Water, wenn een dat opschuucht. Se hebbt nu ehr Lütten, de sünd keen beten nüdelich orr sööt, dat sünd utermaten hässliche Kinner, hebbt rode Glatzen un seht ut as vun'n Mars. Na, de Moder finnt de villicht schöön. Good to fotografeern sünd se ok nich, denn se sünd anduernd in Bewegen. De Moder harr noch mehr Junge, aver de weern un weern nich tosamen op't Bild to kriegen.

De lütten Bachstelzen hüppen vun Seeroos to Seeroos, se möögt Water geern. De Swulken fleegt in'n Sturzfollg na de Wateröverflach un dükert in't Water op de Jagd na Insekten. Dor kannst di vörstelln, dat de Evolution jüst niege Fertigkeiten bi düsse Vagels utbildt: Villicht köönt se in en poor hunnert Johr ok den Brechungsindex vun Water bereken un lütte Fisch ünner Water jagen? Ik heff leest, dat gifft en Swulkenaart, de bet 10 km hooch flegen kann. Aver warum bloots? Insekten sünd dor nich mehr. Dat kann sik doch bloots in de Treckeltied lohnen — över de Alpen flegen un so.

Fungen heff ik ok düsse Fisch: Dat sünd so nöömte Karauschen, ok Moorkarpen nööm, de Uurfoorm vun'n Karpen. Dat hett mi as Angler dull freit. As Kinner hebbt wi de in Massen fungen, hüüt gifft dat bloots noch selten welk, leider. Se sünd heel schöön un glänzt as Guldfisch.

Ik heff de twee natüürlich foorts wedder frielaten un en lütte Meldung an uns Vereen schreven. Dat's jümmer good, wenn de vun'n Vereen dat weet, denn kannst dorna hanneln. Ik höp ja nich, dat dat Water dor utdrögen warrt; dor heff ik en scharp Oog op. De Füerwehren pumpt dor mehrst veel Water rin, aver wenn de Regen utblifft, is ok dat bloots de Drüppen op'n hitten Steen. Wenn't to hitt warrt, hölpt nix, denn mööt de Fisch ümsiedelt warrn. Dat maakt Sinn, wenn een de Aart erhollen will.

Nu steeg de Morgensünn orig höger, dat woor Tied, den Fang na Huus to bringen. De Peer un Köh op de Wischen woorn ok na un na waak un keken mi mit verstännige Ogen to, as ik mien Angeltüüch wedder inpacken dä. Natüürlich angel ik, so oft dat geiht. Dat lohnt sik jümmer, egaal wo veel Fisch een fangt.


24.4.2022


na baven