De Jung mit dat Trudelband

vun Katja Renfert, Marlou Lessing
Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.

Gistern, an'n 4. Mai 2019, woor in Hamborg in de Straat Hütten 86 fierlich de Bronze-Skulptur „Der Jung mit dem Tüdelband“ vun den Künstler Siegfried Assmann enthüllt un inwieht.

Siegfried Assmann, de in Groothansdörp wahnt, is bekannt för sien Arbeiten in Bronze, avers ok för Glasmalerie un de Gestalten vun moderne Karkenfinster.

Un woso woor utrekent düsse Skulptur utrekent över düt Huus opstellt? Wieldat hier, in Hütten 86, Ludwig Wolf wahnt hett, een vun de "Gebrüder Wolf", de dat wiedhen bekannte Hamborger Leed „An de Eck steiht 'n Jung mit 'n Tüdelband“ maakt hebbt. An em un sien Bröder schall de Skulptur erinnern. (Hier de Bericht över de Bröder Wolf vun Dieter Guderian, en Nafahrn vun en Wolf-Broder, de leider doodbleven is.) Ut Sweden is dorför ok Ludwig Wolfs Dochter, de 90-jährige Lieselotte Höbejögi, anreist. In dat smucke Huus is hüüt en Restaurant-Café, to kennen an sien rode Markisen.


Dat Huus Hütten 86. Klick op to'n Vergröttern!

Kiekt wi uns de Skulptur aver wat neger an, dennso seht wi — gor keen Tüdelband! Woneem wi villicht verwachten weern, dat dor een mit so'n Band as bi de rhythmische Sportgymnastik steiht, dor steiht en Jung mit en runden Metallriepen! Un dat is ok ganz richtig so, denn nau dat is dat "Trudelband". So mutt dat richtig heten. "Band" is en oles Woort för "Riepen", dat kümmt ok bi dat Fässermaken vör, 'neem dat Fass mit iesern Riepen "bunnen" warrt (dorher ok de Naam "Fassbinder"). Un mit so'n iesern Riepen kunnst nich veel tüdeln, nee, de woor trudelt — mit en Stock jümmer wedder andreven, dör de Straten jaagt, je döller je beter. Dat weer bit wied in't 20. Johrhunnert en beleevtes Speel för Jungs un Deerns. Bi den hüdigen Verkehr in de Stadt geiht dat natüürlich nich mehr.

Hüüt kennt wi düt Speeltüüch as "Tüdelband", un dorwegen is dat good, dat düsse Skulptur dat richtig wiest: "Tüdelband" is en Verdreihn, villicht wieldat de Jung ja "in'n Tüdel" keem. Avers wenn he dor so stunn, an de Eck, apensichtlich jüst in Roh mit Band un Stock — dor mutt he schon en rechten Töffel west ween, wenn he sik dormit so vertüdeln kunn, nich?


Klick op to'n Vergröttern!


De Gedenktafel an dat Huus Hütten 86.
Klick op to'n Vergröttern!

Siegfried Assmann wiest uns den Jung mit dat Trudelband avers in vulle Aktioon, he steiht nich an'e Eck, sünnern drifft mit de linke Hand den Riepen, wieldess he in de rechte sien "Botterbroot mit Kees" höllt, un dat süht gor nich so ut, as wöör he bald in'n Tüdel kamen. Mit wied uthalen Schreed löppt he souverän blangen sien Riepen langs, bitt vun dat Broot af un kiekt mit sien plietsches Gesicht wied in de Feern. "Hamborg" steiht op den Striepen vun sien Matrosenmütz. Ja, Assmanns Figur hett en Matrosenantoog un Stebeln an, dat weer typisch för de Tied üm de Johrhunnertwenn bet to'n eersten Weltkrieg — de grote Tied vun de Bröder Wolf.

Bi de Fierstunn mit vun de Partie weern natüürlich ok de Künstler sülvst, de Intendant vun't St.-Pauli-Theater, Ulrich Waller, de Schauspeler Peter Franke, de al in Ulrich Wallers Wolf-Revue „Die Jungs mit dem Tüdelband“ Ludwig Wolf speelt hett, un de „Söhne Hamburgs“ (Joja Wendt, Rolf Claussen, Stefan Gwildis) för de Musik. Dat geev ok en lütt Verköstigen un natüürlich „Äppel to'n Klaun“ — un denn „Ruckzuck övern Zaun…"!

De Biller hier wiest, dat de Bröder Wolf meddewiel ok vun de Stadt (mit en egen Stratennaam) un vun de Wohnungssellschap "Hansa" (mit en Gedenktafel) ehrt warrt. Dorbi geht de Opfaten vun de Schrievwies orrig hen un her twüschen "Tüdelband" un "Tüddelband" — avers wi weet ja, dat is en Trudelband.


Biller: Katja Renfert

5.5.2019


trüch


na baven


na't Flack

na de Startsiet