Notizen ut'n Nevelmaand


 

 

 

in't harvstlicht klaar un scharp de kanten,
de muern unerbittlich güllen.
wat bringst du ehr? wat hollt din hannen?
wat is in di, ehr uttofüllen?

 

 

 

 

 

 

 

du weetst vun fitness un vun knööv,
du dwingst den barg, mount everest.
hier steilt sik di en anner prööv.
vergitt allns, wat du weetst un hest.

 

 

 

 

 

de linien loopt in'n achtergrunn,
loopt dwars, loopt biester, loopt verdweer.
se hebbt nich krink noch krüüzfoorm funn.
un liekers steiht dat över ehr.

 

de nische baven is noch frie.
du hest unendlich veel versöök.
de apen wand, se töövt op di.
du füllst ehr mit en ole spröök:

dem unbekannten gotte


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet