Notizen ut'n Maimaand


Foto: Anke Nissen

 

märken

dree lindenbööm staht op den knick,
een swatt, een gries, een witt.

de een steiht links, de anner rechts,
de drütt steiht in de mitt.

in vullmaandnacht, wenn nüms mehr wacht,
denn doot se enen schritt
un tuuscht de steed. un morgens seht
wi dat un roopt: wat's dat?

dree linnenbööm staht op den knick,
een witt, een gries, een swatt.


waterplant

an waterstraten, waterlööp,
an haven orr an't fleet,
in't faste ies, in't siede deep,
an märkenhaftig steed,

in grote stadt, in lila-swatt,
inhüllt in seelenroh,
so diegt un wasst düss waterplant:
de "heidbloom". itzehoe.


buteneerdsche in hamborg-wilhelmsborg
reiherstieg hauptdeich

avendlicht, avendschaap,
freedlich invaschoon!
in de welt vun industrie
summt miteens en toon —

aliens staht op den diek:
nich de LKW
ehr gebölk, nee, as musik
klingt dat leevlich: mäh!


Klick op to'n Vergröttern!


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet