Notizen ut'n Hornung



Klick op to'n Vergröttern!

"wannehr dreept wi dree wedder tosaam?"
"an'n veringkanaal, dicht ünner'n damm."
"ik kaam ut de luft! 'neem ik lann, sühst dor
de afdrück in'n snee!" "ik ok! folg min spoor
över't ies na den plack, 'neem de snee op smölt!"
"dor kaam ik ut hooch ut de ünnerwelt!"
"hei, dat gifft en ringelreihgn!
un much dat snien orrer weihn,
dat ies is dünn, dat ies is glatt,
un 'keen op tridd, den kriggt wi faat!
stuur, stuur
sünd de weeg vun de ruuge natuur!"

as'n maandflach liggt still de veringkanaal,
keen aten röögt sik op un daal,
ünner den snee daut liesen dat ies,
man sühst nix vun, bloots in't fleckige gries
liggt steerns as vun kometen slaan.

un süh dor dat kind an't över stahn,
de ball full em rein ut de hann'n,
kiekt bloots de dunklen steerns noch an —

wat wieder nerrn snüffelt en hund,
as stillnis liggt de snee över'n grund.

"kaam, kaam,
hier dreept wi dree wedder tosaam!"
"un de hund, de op dat iesflach peddt
op aantenjagd?" "he warrt nich reddt!"
"un dat lüttje kind an'n rand vun'n kanaal —
sin ball rullt op't ies...?" "dat mutt hindaal!
hindaal!
stuur, stuur
sünd de weeg vun de ruuge natuur!"


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet