Lübeck. Grafik vun Jutta BredowLübecker Geschichten:
Vun noble Priesdrägers

vun Karl-H. Nissen


Denn gifft dat noch enen Lübecker, de den Nobel-Pries kregen hett, den Friedens-Nobel-Pries. Dat weer Willy Brandt. He is hier groot worrn, he hett dat Johanneum besöcht. Dat is al recht en poor Johr her, dor weern Anneke un ik in Finnland in en lütte Stadt. Dat duur gor nich lang, dor leep en groot Schoof Kinner achter uns her, jümmer mehr, un de hebbt lacht un feixt. En fründlich Fru hett uns dat verklort: dat weern mien Büxen! So wat hebbt de Kinner nich kennt — Knickerbocker!

Un dat gifft en Bild, dor steiht Willy Brandt hier in Lübeck an en Brüüch, un wat hett he an? Knickerbocker.

He is later in Bonn Bundskanzler west, wahnt hett he in Unkel, up de anner Siet vun'n Rhein. Unkel is schöön, kannst ünnen an't Water spazieren gahn, Rootwien gifft dat, un dat gifft noch wat, enen Willy-Brandt-Platz mit dat Willy-Brandt-Forum. In Unkel an'n Rhein.

So wat gifft dat ok in uns Stadt, is doch klor, dat is dat Willy-Brandt-Huus. Dat is, meen ik, keen Museum in de olle Oort. Dor sünd wi mirrn mank in de Johren na den Krieg, köönt mitbeleven, wat sik allens daan un ännert hett. Achtern in den Hoff steiht en Stück vun de Berliner Muur. Nu is dat en oll Huus, dat jetzig Willi-Brandt-Huus, bannig hooch, fröher dat Huus vun de Zirkel-Gesellschaft. Dat weer de vörnehmste Verein in uns Stadt, so wat gifft dat al lang nich mehr. Un nu sull dat Stück Berliner Muur na achtern. Man, wie? 4 Ecken un 4 Mann un dörchdrägen, dat güng nich.

Dor is en Riesenkraan kamen, de hett dat Stück Muur hoochböört. En Mann mit en Funkgerät stünn bi den Kraan up de Königstraat, de anner stünn up den Hoff. Sehn kunnen de beiden sik nich. Un denn güng dat:
"Höger, noch höger!"
"Nu langsam över dat Dack."
"Höger —"
"Langsam..."
"Nu dal!" — un dat hett duurt.

Avers an'n End hett dat klappt. De Muur steiht achtern. Goot Stück Arbeit.

Un denn gifft dat noch enen Mann in uns Stadt, de den Nobel-Pries kregen hett, dat is Günter Grass. He is in Danzig up de Welt kamen, man ik denk mi, dat hett sien Ordnung. Danzig un Lübeck, de beiden hebbt veel, wat tohoop passt.

He wahnt nich wietaf in't Lauenborgsche, sien Büro is al lang hier in de olle Stadt, un denn is dor ok dat Museum, dat "Günter-Grass-Huus". Dor kann en sien Bildhauerarbeiten sehn un wat un wie Günter Grass schreven un maalt hett. Un Utstellungen gifft dat dor, ganz verschieden, vun Lüüd de maalt un schreven hebbt, so as Wilhelm Busch orrer Goethe. Wenn wi baben ut dat Finster seht, denn köönt wi wiet över Lübeck kieken, un wenn wi wüllt, denn köönt wi vun't Günter-Grass-Huus dörchgahn na dat Willy-Brandt-Huus.


Teknen: Jutta Bredow
14.8.2016

 


trüch


na baven


na't Flack

na de Startsiet