Limericks för März

van Ludgerd Lüske

Osterküken

Van dei Klucksche nöhm twei Eier dei Osterhaosen-Junior,
hei wull bi't Ostergeschäft uck mithelpen, dat is wohr.
Aale Eier kömen bunt in dei grote Kiepen,
vull dö dei up dei Haosenschullern kniepen.
In't Osternest seet tüschken dei Eier ein Kükenpoor.

Paopstmisse in Rom

Hein möök Urlaub in dei Weltstadt Rom
un besöchde den grooten Petersdom.
Dor kunn dei hillge Vaoder för üm
eine Misse läsen, hei bäede dorüm.
Dei Paopst dö dat uck — in sienen Droom.

 

 

 

Dei Meeschkenkassen

In Greumen dö ein Boom upwassen,
Theo hüng doran den Meeschkenkassen.
Tau siene Frau sä don dei Meeschkenmann,
Nu fangt wi eis dat Esten an.
Den Boompicker dö dat gornich passen.

Stork in Neimäöhlen

In Neimäöhlen treet ein Stork an't Schlatt,
bi dat Poggenvolk geef't don Theaoter satt.
Man hei güng mit'n lüttken Fischk hendaol,
för siene Küken was et dat Freidaogsmaohl.
Dei luuren Schietreiher har den uck so gerne hatt.