In dei Ieswelt
Fahrt an'n 16. 01. 2012

Von Gisela Reink; Fotos Gisela Schwarz, Rostock


Se köönt de mehrsten Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.

Uns Maat P. führt mit uns na Korls Erläwnisdörp, un dat in sienen Urlaub. Wi freuden uns oewer siene Gefälligkeit un sünd werrer bannig niegierig up dei Ieswelt.

Ditmal is ok dat ganze Ümfeld up dat Thema instellt. Dat heit, dat allens rundherüm dei reinste Zirkus is. Dat geiht all bi den 'n Ingang los. An dei Kass' steiht ein Kierl, dei ok as Zirkusclown fungier'n künn. Dei Anlag vör den 'n Ingang is mit sihr graw Saegmähl utstreut, so as dat in dei Manegen nastens ok tau seihn is. Dei Kiosk süht as'n Zirkuswagen ut. So war' ick gliek up dei Vörstellung instimmt. Nu trug ick mi upt ' Ies, in 't Ies un gah denn schnurstracks dörch't Ies — bet ick na 25 Minuten binah tau einen Iesklumpen worden bün.

Ick har jo glieks gera 'ut gahn künnt. Dor is nämlich 'ne Iesbar mit speigelglatten Iesdisch, mit eine fellbelechte Iesbank un mit väle Jägermeisterbuddels achter den 'n Ies-Tresen. Har'ck mi dor ierst einen inhulpen, denn har ick woll all dei Attraktionen verpasst, wägen dei ick herkamen bün.

Empfangen deit mi ein fründlicher, dicker, groter, gaut antreckter Jongleur. Achter em hemm' sick dat twei bannig gewaltige Elefanten mit ehren Achtersten up bequeme Elefantenschämels gemütlich makt. Können dei bärer jonglieren?

In dit grote Areal sünd dei einzeln Manegen mit dünne, rode, lange Stoffbahnen afdeilt. Ick schuf 'ne Stoffbahn bisiet un krich einen bannigen Schreck. Dor rasen doch glattwech twei grote schwore Motorroed' up mi tau, un ick kann't un kann't nich glöben, dat eine ward von einen utwussen Elchbuck un dat anner von einen riesigen Tiger stüert, dei ok noch dei Tähnen fletschen deit.

As ick dorachter noch einen Gorilla entdecken dau, dor ward mi grugen. Bloten wech hier! Ick riet ut.

Na? Wat gifft dat denn dorachter tau seihn? Sallen dat Schlangenminschen sien? Wenn ick mi dei Verrenkungen ankieken dau, denn möt ick unwillkürlich an "Fipschen Fleischer mit dei elastischen Beinen" denken. Disse Akrobaten schienen gor keine Knaken in ehren Liew tau hemm', dat sünd dei reinsten Gummiminschen. Gehürn dei Hacken nu an dei Uhrn orrer nich, dei Kopp up den 'n Nors orrer nich un dei Knei an dei Bussens orrer nich? Ick stell ' fast, dat nich ein Gelenk dor sitten deit, wo ein normaler Minsch dat sitten hett. Dorna verwiel ick bi dei Clowns, dei mit ehre Tricks ok verzaubern könn'n.

Ne, nu möt ick wat Normales seihn. Dor is dei Pierd-Maneg'. Allein dei Ingang lött mien Hart höger schlagen. Dei Pierdköpp ut dörchsichtig Ies dor baben sünd einfach schön. Tauierst denk ick, dor galoppieren lurer Einhurns, oewer statt Hurn bi jedein Pierd is dat bloten ümmer 'ne Ferrer as Koppschmuck. Dor seih ick würklich gaude Dressuren un oewerseih tauierst dat lütte Ponypierd mit sienen Wagen.

Genauso wunner ick mi oewer dei Dressuren von Löwen un Tiger. Ne, wo gelaten dei Dresseur mang den'n brüllenden Löwen un dei schnubende Grotkatt stahn deit. Ne, wo maudig dei Fru bi denn dörch den'n Ring springenden Tiger stahn un galant dei Akrobatin dor baben oewer den'n Buurgen schwäben deit, un dei Ingang ierst!!! Man möt glattwech dörch ein Löwen-Mul ut Ies lopen.

Hier oewerall gifft dat soooväl tau kieken un tau freuden, un dat dau ick ok hoch baben von den'n Lopbalkon ut. Sogor hier is allens ut Ies, wat bloten ut Ies sien kann. Dei Iesrutsch möt ick nich benutzen. Ick kann dei Holttreppen werrer runnerstiegen un lop gra'wechs up ein Karussell tau — ut Ies selbstverständlich.
In dei Mitt grient mi, uprecht stahend, eine sihr korpulente Soeg an. Mit dit Karussell tau führn wagen nich mal dei Görn. Wecker will ok einen kollen Nors kriegen?

Ick begäw mi in Richtung Utgang, wiel ick richtig dull verklamt bün. Faststellen möt ick, dat disse Ieswelt noch schöner is as dei von 2011. Ut jede Iesskulptur, egal ob ut witt Ies orrer dörchsichtig Ies, hemm' dei Künstler ut Russland, Ukraine un Polen allens akribisch ruterarbeit't, wat jede Figur an Fienheiten bloten hemm' kann. Bloten schad', dat disse Kunst äbenso vergänglich is as dei Sandskulpturen.

Dei Besäuk hett mi gaut dan. Hart un Seel' hemm' uptankt, wat in disse Johrestiet bannig nödig is. Dat wi Krink-Frugens nastens uns bi Kaffee un Kauken upwarmen daun un noch unbedingt Geld utgäben möten, gehürt tau dissen Namiddag un is woll ok tau dei Verkopsstrategie von Korl. So is dei Fohrt eine gaude Fohrt wäst, von dei ick noch lang'n tehren dau.


Dat lütte Ponypierd mit den'n Wagen seggt Adjüs!


29.1.2012

trüch


na baven


na't Flack

na de Startsiet