Thilda, de Blomenelf:
Thildas niege Upgaav


Leev Kinner, ik bün en Blomenelf
un höör up den Naam Thilda.

As Tappi in den Februarmaand wedder to sien Sipp güng, hett he mi ropen. Wi kennt uns al lang: "Thilda, du kannst mi aflösen un up den Goorn mit all de lütten smucken Blööm vun de Fru uppassen!" Dor heff ik mi up den Weg maakt.

Glieks as ik dörch de Goornpoort keem, wöör ik de velen gelen Winterlinge un de zoortlila Elfenkrokus wies.


Kannst du de Geetkann finnen? Thilda hett ehr foorts sehn!

En Geetkann stünn ok noch in de Eck. Dormit kunn ik later de Blööm begeten.

Mien Weg güng wieder över den Rasen na dat Huus. Dor stünn en Elfenkrokus ganz alleen meern in'n Weg. De wull mi wull "Goden Dag!" seggen.


Elfenkrokusse sünd en heel snackhaftige Bande! Man good, dat bloots Elfen ehr Gedanken hören köönt!
Wenn se richtig snacken kunnen, wöörn wi Minschen dat in so'n Krokuswisch keen fief Minuten uthollen!

He weer al bannig groot. Up den langen dünnen Stengel schaukel he bi jeden lütten Windstoot hin un her. "Laat di man nich ümpussen!", lach ik un keek em an. Övern Kopp wussen weer he mi noch nich.

Nu müss ik mi aver för de Nacht eerstmal en Wahnung söken. An Märzenbeker, Sneekieker un Winterlinge vörbi keem ik na de Terrass.


Och nee, wat'n Pracht! Un up allens dat schall Thilda uppassen!

Ünnen ut de Heck keken mi noch en poor smucke Leverblööm an.


Lever na de Leverblööm? Nee, lever na de Terrass!

Endlich weer ik up de Terrass. Mank twee Steenplatten vör enen Blomenputt harr sik doch en Elfenkrokus dörchwrangt. Ik heff em richtig bewunnert!


Oh, düsse Snacker! Nu snackt se wedder en halve Stünn!

Up de Terrass stünn noch en Putt mit Blööm baben up en Boomstubben. Dor weer seker en Wahnung för mi frie. Aver vör de Wahnung seet en Gimpel un pass up. Dat weer en ganz bunten un smucken Keerl!

Wi hebbt denn miteenanner snackt un he hett mi de Wahnung geven.

Dat is villicht ganz goot, wenn ik en Uppasser heff! Denn kann ik seker beter slapen.


Uaaah, Thilda is mööd! De Nacht kümmt, dat schummert al.

Neegst Maal vertell ik mehr!

Gode Nacht!
Juuch Thilda


Un hier warrt de Geschicht vörleest:


Lesen deit Antje Heßler in holsteiner Platt.


Fotos un Text: Antje Heßler
25.3.2012

 

 


na baven