Sommertiet

vun Behrend Böckmann

Dei Hås, dei lecht dei Stiern in Folen:
Dei Klocken schall dei Düwel holen!

Dat Osterfest wier nich mihr wiet
dortau keem denn dei Sommertiet,
un wat uns Hås so gor nich mach,
dat beidet licht an'n glieken Dach.

In'n Düstern mösst hei nu upståhn,
mösst 'ne Stunn ihrer losgåhn
un in't Grågen sotauseggen
dei Eier inne Nester leggen.

Dei Hås treckt hier ein lange Flapp:
Verdori! Miene Tiet warrt knapp!

All vier Mål* wür in dit Johrhunnert
tau't Osterfest all düchtig wunnert:
Künn den Håsen wat mallüren,
künn dei Sommertiet em stüren?

Och! Dei Håsen sünd so flietig!
Jümmer wedder schaffen s' tiedig
all dei Oster-Eierie!
Un fählt mål eins, denk di dorbi:
Dat langt mi schon, ik frei mi an!
Dei Hås, dei hett sien Bestes dåån!

As Dalí sien Klocken smölt
den Oosterhaas sien heile Welt:
De neegste Week för sien Wurachen
fehlt em ein Stünn! — Wat schall hei machen?!

* 2005, 2013, 2016 , 2024 wüür an'n Ostersünndag up Sommertiet ümstellt,
dit Johr wüür inne Nacht von'n Sünnavend up hüüt (Palmsünndach),
von den 28. up 29. März dei Klock üm 'n Stunn up dei Sommertiet vörstellt.