In de Ostereierfabrik


"Eier! Eier! Wi bruukt Eier!"

De Oosterhaas weer in grote Noot. De Eier för dat Oosterfest harr he al verdeelt. He harr keen Eier mehr in sien Korf. Wat sull he blots maken? He müss doch noch wieder. Vele Kinner töövten noch up Oostereier.


"Ga-Gack! Ik heff mi so good tarnt, dat ik dach, ik weer nich to sehn!
Woans hest du mi funnen? Dör mien roden Koppsmuck?"

Up de Straat keem em en Hehn in de Mööt. De kunn he villicht fragen. Se schick em wieder na den Hahn. De keem jüüst mit sien Fru dörch den Knick vun den Höhnerhoff.


"Hallo Oosterhaas! Mien Mann is en echte Macho! Kann ik di helpen?"

De beiden menen ok, dat weer wull dat Best, wenn he na den Höhnerhoff güng. Dor geev dat jedeen Dag frische Eier. Mit den leeren Korf över den Arm güng de Oosterhaas wieder.


"Hallo Höhner! Helpt ji mi?"

Verlopen kunn he sik nich. Dat Gakeln vun de Höhner wies em den Weg. Üm den Hoff weer en höltern Stakett mit en Poort. Dor achter weern de Höhner. So veel Höhner harr de Oosterhaas noch ni up'n Hupen sehn. Wenn se em helpen wulln, denn kreeg he seker sien Korf noch vull.


"Klaar, Oosterhaas, wi helpt di! Man her mit den Korf! Den maakt wi vull!"

De Höhner leten sik ok nich lumpen. Oostern, ja klaar, dat weer wat Besünners, da wöörn se em nich hangen laten! Tosamen wöörn se de Eier wiss tostann kriegen. — Un se dään dat ok!

Glücklich güng de Oosterhaas wieder un sä ok veelmaals Dankschön.

Blots de Eier weern nich bunt. He müss nu noch na de Oostereierwarksteet un de Eier anmalen laten. Tofreden güng he trüüch, dat kreeg he bit Oostern seker ok noch torecht.


Nu mutt de Oosterhaas flietig ween!


Fotos un Text: Antje Heßler
29.3.2015


na baven