Modder Sünn ehr Kinner:
In de Sandbäckerie

Märken vun Sophie Reinheimer, överdragen vun Klaus-Dieter Tüxen

Buten, vör de Stadt, merrn op den groten Platz ünner de olen Bööm, is en Sandhupen. Dor schippt un buddelt, solang de leve Sünn schienen dä, lüttje Jungs un Deerns mit rode Backen, as müssten se ehr Middagsbroot verdenen.

De lütt Rosel backt Koken. De Formen dorto hett Tant Greet ehr to'n Geboortsdag schenkt, as Rosel fief Johr oolt worr.
See backt sietdem an'n leevsten Sandkoken. Teihn lüttje Koken ståht all fein sorgfältig op gröne Bläder: Veer schöne, runde Puttkoken, dree Kranzkoken un dree Nuttkoken. De Nutt båvenop is jümmers en lütte Steen.

"Musst mi åvers ok welke afköpen, Schorsch", sä Rosel to den lütten, dicken Jungen, dee dor mit ehr spelen dä. Hee is eerst veer Johr oolt un deit allns, wat Rosel verlangen deit. Hee köfft ehr een'n Nuttkoken af, dee kost fief Euro. Schorsch betåhlt mit fief lütte Steens.