Dat kannst mi glööven!
Verrückt

vun Heiner Zumdohme


To'n Anhören hier klicken:


Lesen deit Heiner Zumdohme.


"Nu stell di vör!", dorbi dor lessdens ein ollet Menschke tau mi, "mien öllsten Säöhn häff hier aals taugäwen un is mit sien Fraumenschk un siene Kinner up eine Insel in't Middelmeer trokken. Hei will dor ein lüttket Hotel upbawen un Wannerungen för Naturliebhaber anbeien. Nu häff hei uck noch anfangen, dei Sterne tau studeiern, un aale Vaögel van dei Insel kennt hei nu uck all utwennig. Hei is eegentlick Ingenieur. Aower hei sä tau mi, dat hei van dei Technik nicks mehr lernen kunn. Blots noch van dei Natur!"

Dat Menschke scheen heller verdraoten äöwer dat, wat ehr Säöhn dor mök. Un ick gäw tau, uck ick dachte taueierste: dei häff se nich aale binanner.

Aower dann köm mi in'n Sinn: Wecker nich uck aff un tau maol verrückt is, dei werd Jesus villichte seläwe nich verstaohn. Christen maöt verrückt wän. Verrückt naug, aals tautogäwen un achter sick tau laoten. Sei mäöt uck maol verrückt naug wän, sick ein ganz anneret Läwen un eine ganz neie Welt vörstellen tau kaönnen.

Uck Jesus hörde nich tau dei Vernünftigen, dei aals immer fortsen kaomen seiht un dorümme dei Finger dorvan laotet. Dei Bibel vertellt masse Geschichten dorvan, dat hei eine ganz neie Eern will, eine Eern, dei naoh use Maote, up'n Kopp staiht: So taun Bispill van ein'n Vaoder, dei sienen Säöhn, dei heller ut'e Aort schlaogen un van Wäg affkaomen is, wer bis sick in't Huse upnümmp, aohne dull up üm tau wän. Stell di vör, dor steiht sogor wat van einen rieken Kerl, dei möck eine groote Fier, un wecken laodt hei in? Aaale dei, dei sick uppe Straoten rümmedriewet!


Aale Väögel kennen un een hebben is nich so'n groten Ünnerscheid!

Worümme nich aff un tau gägen aals hanneln, wat man so gewennt is? So as Jesus. Un aff un tau hör ick van sücke "Verrückten", dei gaut tau Jesus passen dön, so as den Säöhn, van dat olle Menschke, dei hier aals verköfft häff un wegtrocken is.

ortau fallt mi noch eine annere Geschichte van Jesus in: Dor verglick hei dat Himmelriek mit einen Schatz, dei deip inne Grund vergraowen wör. Ein Kerl köm un fünd den Schatz. Un in siene Fraide daoröwer güng hei hendaol un verköffde aals, wat hei har, un köffde den Acker! Uck so'n ein'n, dei sei schienbaor nich aaale binanner häff. Man dei Welt brucket sücke "Verrückten", dei för eine Eern aohn Striet un in Fräen aals up eine Korte settet.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


10.12.2017


na baven